ന്യൂഡൽഹി: പ്രധാനമന്ത്രി നരേന്ദ്രമോദി 15ന് തിരുവനന്തപുരം ശ്രീ പത്മനാഭ സ്വാമി ക്ഷേത്രത്തിൽ ദർശനം നടത്തും. കേന്ദ്ര ടൂറിസം മന്ത്രാലയം സ്വദേശി ദർശൻ പദ്ധതിയനുസരിച്ച് പൂർത്തിയാക്കിയ പദ്ധതികൾ മോദി ഉദ്ഘാടനം ചെയ്യുമെന്നും കേന്ദ്ര സഹമന്ത്രി അൽഫോൻസ് കണ്ണന്താനം അറിയിച്ചു.

വൈകിട്ട് ഏഴിനും ഒൻപതിനും ഇടയ്ക്കായിരിക്കും പ്രധാനമന്ത്രിയുടെ ഷേത്രദർശനം. ടൂറിസം പദ്ധതികളുടെ ഉദ്ഘാടന ചടങ്ങിൽ ഗവർണർ പി. സദാശിവം, മുഖ്യമന്ത്രി പിണറായി വിജയൻ, കേന്ദ്ര മന്ത്രി അൽഫോൻസ് കണ്ണന്താനം, കേന്ദ്ര ടൂറിസം സെക്രട്ടറി യോഗേന്ദ്ര ത്രിപാഠി , സംസ്ഥാന ടൂറിസം മന്ത്രി കടകംപള്ളി സുരേന്ദ്രൻ, ശശി തരൂർ എംപി, വി.എസ്. ശിവകുമാർ എംഎൽഎ, മേയർ വികെ പ്രശാന്ത് എന്നിവർ പങ്കെടുക്കും.

പൈതൃക കാൽനടപ്പാതയും പത്മതീർത്ഥകുളം നവീകരണവും ഉൾപ്പെടെ 75.88 കോടിയുടെ പദ്ധതികളാണ് ടൂറിസം മന്ത്രാലയം ഇവിടെ നടപ്പാക്കിയത്.