മൂവാറ്റുപുഴ: ബാലാവകാശ സംരക്ഷണത്തിൽ കേരളം ഇതര സംസ്ഥാനങ്ങൾക്ക് മാതൃകയാണെന്ന് എൽദോ എബ്രഹാം എം.എൽ.എ അഭിപ്രായപ്പെട്ടു. സംസ്ഥാന ബാലാവകാശ സംരക്ഷണ കമ്മിഷന്റെ ആഭിമുഖ്യത്തിൽ ജില്ലാ ശിശു സംരക്ഷണ യൂണിറ്റിന്റെ സഹകരണത്തോടെ മൂവാറ്റുപുഴ ബ്ലോക്ക് പഞ്ചായത്ത് ഓഡിറ്റോറിയത്തിൽ നടത്തിയ ഏകദിന ശില്പശാല ഉദ്ഘാടനം ചെയ്യുകയായിരുന്നു അദ്ദേഹം. കുട്ടികളുടേയും സ്ത്രീകളുടേയും ഉന്നമനം ലക്ഷ്യമാക്കി സംസ്ഥാനത്ത് നടപ്പാക്കുന്ന പദ്ധതികളാണ് ഇതിന് കാരണം. ശിശു സംരക്ഷണ സമിതികൾ താഴേത്തട്ടിൽ സജീവമായാലേ ഇക്കാര്യത്തിൽ കാര്യമായി മുന്നോട്ടുപോകാൻ കഴിയൂവെന്ന് ശില്പശാലയിൽ ക്ലാസ് നയിച്ച സം സ്ഥാന ബാലാവകാശ കമ്മിഷൻ ചെയർമാൻ പി. സുരേഷ് അഭിപ്രായപ്പെട്ടു. കമ്മിഷനംഗം ഡോ. എം.പി. ആന്റണി അദ്ധ്യക്ഷത വഹിച്ചു. എൽദോസ് കുന്നപ്പിള്ളി എം.എൽ.എ, ജില്ലാ പഞ്ചായത്തംഗം എൻ. അരുൺ, ബ്ലോക്ക് പഞ്ചായത്ത് പ്രസിഡന്റുമാരായ ജോസിജോളി, സുമിത് സുരേന്ദ്രൻ, ബ്ലോക്ക് വൈസ് പ്രസിഡന്റ് സുഭാഷ് കടക്കോട്, കെ.ബി. സൈന തുടങ്ങിയവർ പ്രസംഗിച്ചു.