മൂവാറ്റുപുഴ: പൊതു പണിമുടക്ക് രണ്ടാം ദിവസവും മൂവാറ്റുപുഴയിൽ ഭാഗികം. സർക്കാർ ഓഫീസുകളും ബാങ്കുകളും വിവിധ പൊതുമേഖലാ ഓഫീസുകളും വിദ്യാലയങ്ങളും പ്രവർത്തിച്ചില്ല. കെ.എസ്.ആർ.ടി.സിയും സ്വകാര്യബസുകളും ടാക്സി വാഹനങ്ങളും ഓട്ടോറിക്ഷകളും ഓടിയില്ല. സ്വകാര്യ വാഹനങ്ങളും ഇരുചക്രവാഹനങ്ങളും ഓടി. വ്യാപാര സ്ഥാപനങ്ങൾ പലതും തുറന്നിരുന്നു.
പണിമുടക്കിയ ജീവനക്കാരും തൊഴിലാളികളും നഗരത്തിൽ പ്രകടനം നടത്തി . തുടർന്ന് കച്ചേരിത്താഴത്ത് നടന്ന പൊതുസമ്മേളനം സി.ഐ.ടി.യു ജില്ലാ ട്രഷറർ പി.ആർ. മുരളീധരൻ ഉദ്ഘാടനം ചെയ്തു. ഐ.എൻ.ടി.യു.സി റീജണൽ പ്രസിഡന്റ് ജോൺ തെരുവത്ത് അദ്ധ്യക്ഷത വഹിച്ചു. മുൻ എം.എൽ.എ ജോസഫ് വാഴയ്ക്കൻ, സജിത് ടി.എസ്. കുമാർ ,സി.കെ. സതീശൻ, എൻ. അരുൺ, പി.പി. ജോർജ്, എം.എ. സഹീർ, കെ.എ. നവാസ്, സി.കെ. സോമൻ, പി.എം.ഇബ്രാഹിം,ദിലീപ്, ബോസ് എന്നിവർ പ്രസംഗിച്ചു.