പറവൂർ: പറവൂർ നഗരത്തിൽ നടപ്പാക്കാൻ ഉദ്ദേശിക്കുന്ന ടൗൺ മാസ്റ്റർ പ്ളാൻ നഗരസഭ കൗൺസിൽ ഭേദഗതി നൽകി സർക്കാരിന് സമർപ്പിച്ചിട്ട് ഒരു വർഷമാകുന്നു. സർക്കാർ അംഗീകാരം ലഭിക്കാത്തതിനാൽ റോഡിനോട് ചേർന്നുള്ള കെട്ടിടങ്ങൾക്കും വീടുകളും നിർമ്മാണ അനുമതി നീളുകയാണ്.

2013ലാണ് നിലവിലുള്ള മാസ്റ്റർ പ്ളാൻ കൗൺസിൽ അംഗീകരിച്ച് സർക്കാരിന് സമർപ്പിച്ചത്. വേണ്ടത്ര പരിശോധനകളില്ലാതെയാണ് കൗൺസിൽ അംഗീകാരം നൽകിയത്. ടൗൺ പ്ളാൻ നിലവിൽ വന്നതോടെ കെട്ടിടങ്ങളും വീടുകളുമടക്കും നൂറുകണക്കിന് നിർമ്മാണ പ്രവർത്തനങ്ങൾക്ക് അനുമതി ലഭിക്കാതെയായതോടെയാണ് ടൗൺ പ്ളാനെക്കുറിച്ച് കൂടുതൽ ജനങ്ങളിലെത്തുന്നത്.

നഗരത്തിലെ വലുതും ചെറുതുമായ അറുപതിൽപരം റോഡുകളാണ് ടൗൺ പ്ളാനിന്റെ പരിധിയിൽ ഉണ്ടായിരുന്നത്. നഗരസവാസികളുടെ എതിർപ്പ് ശക്തമായതോടെ കഴിഞ്ഞ സർക്കാരിന്റെ കാലത്ത് ഉത്തരവ് മരവിപ്പിച്ചു.

പൊതുജനങ്ങളിൽ നിന്നും നിർദ്ദേശങ്ങൾ സ്വീകരിച്ച് 2018 ഫെബ്രുവരി ഒമ്പതിന് ഭേദഗതി ചെയ്ത മാസ്റ്റർ പ്ളാൻ സർക്കാരിനു നൽകി. ജനവാസ മേഖലയിലെ വ്യവസായ മേഖല, ഐടി സോൺ, മാലിന്യ പ്ലാന്റ് വികസനം എന്നിവ ഒഴിവാക്കിയിരുന്നു. അറുപതോളം ചെറിയ റോഡുകളുടെ വീതി കൂട്ടൽ ഉപേക്ഷിച്ചു. ഉൾറോഡുകളുടെ വീതി മുപ്പതിൽ നിന്നും പതിനഞ്ചായും ഇരുപത്തിരണ്ടിൽ നിന്നും പന്ത്രണ്ടായും കുറച്ചു. ഭേദഗതിക്ക് അംഗീകാരം ലഭിച്ച് ഉത്തരവ് നഗരസഭക്ക് ലഭിച്ചാൽ മാത്രമേ മൂന്നു വർഷത്തിലധികമായി നിർമ്മാണം തടസ്സപ്പെട്ട നിരവധി വീടുകൾക്കും കെട്ടിടങ്ങൾക്കും അനുമതി ലഭിക്കൂ.