നെടുങ്കണ്ടം: അസാമിൽ പട്ടാള ട്രക്ക് മറിഞ്ഞ് മലയാളി സൈനികൻ മരിച്ചു. കരസേനയുടെ അസാം റെജിമെന്റിലെ ട്രക്ക് ഡ്രൈവറായ ചേമ്പളം നന്തികാട്ട് (ചേനപ്പുര) ജോസഫിന്റെ (റജി) മകൻ റോബിനാണ് (22) മരിച്ചത്. ഞായറാഴ്ച വൈകിട്ട് റോബിൻ ഓടിച്ചിരുന്ന ട്രക്ക് കൊക്കയിലേക്ക് മറിയുകയായിരുന്നെന്നാണ് കരസേന വീട്ടുകാരെ അറിയിച്ചത്. രണ്ട് വർഷം മുമ്പാണ് റോബിൻ ഡ്രൈവറായി കരസേനയിൽ പ്രവേശിച്ചത്. സെഗ്മന്റിൽ നിന്ന് 300 കിലോമീറ്റർ അകലെയാണ് അപകടം നടന്നത്. മൃതദേഹം നാട്ടിലെത്തിക്കുന്നതിനുള്ള നടപടികൾ കരസേന സ്വീകരിച്ചു. മാതാവ് സെലിൻ. ബി.കോം വിദ്യാർത്ഥിനി റോസ്മി ഏക സഹോദരിയാണ്.