കാസർകോട്: ശബരിമല കർമ്മ സമിതി സംഘടിപ്പിച്ച അയ്യപ്പജ്യോതി പീലിക്കോട്ട് ഉദ്ഘാടനം ചെയ്ത മുൻ കോളേജ് അദ്ധ്യാപികയുടെ വീടിനു നേരെ ബോംബ് ആക്രമണം. പടന്നക്കാട് നെഹ്റു ആർട്സ് ആൻഡ് സയൻസ് കോളജ് മുൻ പ്രിൻസിപ്പൽ ഡോ. പി.വി. പുഷ്പജയുടെ കൊടക്കാട് പൊള്ളപ്പൊയിലിലെ വീടിനു നേരെയാണ് ആക്രമണമുണ്ടായത്. വീടിന്റെ ജനൽച്ചില്ലുകൾ തകർന്നു. ഭിത്തിക്കും കേടുപറ്റി.

നാലഞ്ചു ദിവസമായി വീട്ടിൽ ആളില്ലായിരുന്നു. എറണാകുളത്തായിരുന്ന കുടുംബം ഇന്നലെ തിരിച്ചെത്തിയപ്പോഴാണ് സംഭവം ശ്രദ്ധയിൽപ്പെട്ടത്. ചീമേനി പൊലീസ് അന്വേഷണം തുടങ്ങി.

പുഷ്പജയുടെ വിരമിക്കൽ ചടങ്ങിനിടെ ചില വിദ്യാർത്ഥികൾ പടക്കം പൊട്ടിച്ചതും 'ആദരാഞ്ജലി' ബോർഡ് വച്ചതും നേരത്തേ വിവാദമായിരുന്നു.