കണ്ണൂർ: തൊഴിൽരഹിതരായ ഭിന്നശേഷിക്കാർക്ക് ചെറു സംരംഭങ്ങൾ തുടങ്ങാനായി തൊഴിൽ വകുപ്പ് കൊണ്ടുവന്ന 'കൈവല്യ വായ്പ' പദ്ധതിക്ക് വൈകല്യം ബാധിച്ച അവസ്ഥ. സംസ്ഥാന തൊ​ഴി​ൽ വ​കു​പ്പ് 2016 ൽ തുടങ്ങിയ പദ്ധതിയിൽ 9000 പേർ അപേക്ഷ നൽകിയെങ്കിലും

ഇ​തു​വ​രെ സ​ഹാ​യം കി​ട്ടി​യ​ത്​ വെറും 631 പേ​ർ​ക്കാണ്. ഫണ്ടില്ലാത്തതാണ് പദ്ധതി മുടങ്ങാൻ കാരണമെന്നാണ് അധികൃതർ പറയുന്നത്.

പദ്ധതി പ്രകാരം പ​ര​മാ​വ​ധി 50,000 രൂ​പ വ​രെ​യാ​ണ് ഒ​രാ​ൾ​ക്ക് അ​നു​വ​ദി​ക്കു​ക. അ​ഞ്ചു​വ​ർ​ഷം​കൊ​ണ്ട് 25,000 രൂ​പ തി​രി​ച്ച​ട​ച്ചാ​ൽ മ​തിയെന്നാണ് വ്യവസ്ഥ. സ്വ​ന്ത​മാ​യി തൊ​ഴി​ലോ വ​രു​മാ​ന​മോ ഇ​ല്ലാ​തെ ജീ​വി​ക്കു​ന്ന​വ​രാ​ണ് അ​പേ​ക്ഷ​ക​രി​ൽ ഭൂ​രി​ഭാ​ഗ​വും. ന​ട​ക്കാ​ൻ ക​ഴി​യാ​ത്ത​വ​രും വീൽചെ​യ​റി​ൽ സ​ഞ്ച​രി​ക്കു​ന്ന​വ​രും ഏ​റെ പ്ര​യാ​സപ്പെട്ടാണ് എംപ്ലോയ്മെന്റ് ഓഫീസുകളിൽ കയറിയിറങ്ങി അ​പേ​ക്ഷ സ​മ​ർ​പ്പി​ച്ച​ത്. അഞ്ച് ​ദി​വ​സ​ത്തെ സം​രം​ഭക​ത്വ ക്ലാ​സുകളിലും ഇവർ പ​ങ്കെ​ടു​ത്തു. ചെ​യ്യാ​ൻ ക​ഴി​യു​ന്ന സ്വ​യം തൊ​ഴി​ൽ സം​രം​ഭം ക​ണ്ടെ​ത്തി അപേക്ഷകർ പ്രൊപ്പോസൽ സമർപ്പിക്കണം. ഇ​തി​ന്​ രേ​ഖ​ക​ൾ തയ്യാ​റാ​ക്കാ​നും യാ​ത്ര​കൾക്കുമായി ഒരാൾക്ക് 3000 രൂപവരെ ചെലവായെന്ന് അപേക്ഷകർ പറയുന്നു.

പദ്ധതി ഇങ്ങനെ

വായ്പതുകയുടെ 50 ശതമാനം, പരമാവധി 25000 രൂപ വരെയാണ്‌ സബ്‌സിഡി. പലിശരഹിത വായ്പയാണ്‌ .

കച്ചവടം, സേവനം, ലഘുനിർമാണ യൂണിറ്റ്, കൃഷി എന്നീ മേഖലകളിൽ നിന്നു സംരംഭങ്ങൾ തിരഞ്ഞെടുക്കാം

കൈവല്യ പദ്ധതിക്കായി കിട്ടിയ ഒരു കോടി രൂപ ഇതിനകം വിതരണം ചെയ്തു കഴിഞ്ഞു. കുറഞ്ഞത് 30 കോടിയെങ്കിലും കിട്ടിയാലെ മുഴുവൻ അപേക്ഷകർക്കും കൊടുത്തു തീർക്കാൻ കഴിയൂ. സർക്കാരിൽ നിന്ന് ഫണ്ട് കിട്ടിയാലുടൻ വിതരണം ചെയ്യും.

-കെ.എസ്. ഹരികുമാർ

ഡെപ്യൂട്ടി ഡയറക്ടർ

എംപ്ളോയ്മെന്റ് ഡയറക്ടറേറ്റ്

കൈവല്യ വായ്പാ പദ്ധതിക്ക് ആവശ്യമായ ഫണ്ട് അനുവദിച്ച് ഭിന്നശേഷിക്കാരുടെ ദുരിതം പരിഹരിക്കണം.

-രാജീവ് പള്ളുരുത്തി

ജനറൽ സെക്രട്ടറി

സംസ്ഥാന വീൽചെയർ റൈറ്റ്സ് ഫെഡറേഷൻ