ഏറ്റവും കൂടുതൽ വീട് നൽകുന്ന ആദ്യ 5 നഗരസഭകളിൽ മാനന്തവാടിയും

മാനന്തവാടി: 2020 ഓടെ എല്ലാവർക്കും ഭവനം എന്ന ലക്ഷ്യം മുൻനിർത്തി നടപ്പിലാക്കുന്ന കേന്ദ്രാവിഷ്‌കൃത പദ്ധതിയായ പ്രധാൻ മന്ത്രി ആവാസ് യോജന, സംസ്ഥാന സർക്കാരിന്റെ ലൈഫ് മിഷനുമായി ചേർന്ന് മാനന്തവാടി നഗരസഭയിൽ നടപ്പാക്കുന്ന ഭവന പദ്ധതി പുരോഗതിയിൽ. 2017 നവംബറിൽ മാനന്തവാടിയിൽ തുടക്കം കുറിച്ച പദ്ധതിയിൽ 1325 കുടുംബങ്ങളാണ് ഗുണഭോക്താക്കളായിട്ടുണ്ടായിരുന്നത്. ഇതിൽ 822 പേർക്ക് ഒന്നാം ഗഡു തുക ലഭിക്കുകയും നിർമ്മാണ പ്രവർത്തനങ്ങൾ ആരംഭിക്കുകയും ചെയ്തു.നിർമ്മാണം പൂർത്തിയായ 101 വീടുകളുടെ താക്കോൽദാനം നാളെ ജനുവരി 16 ന് നടക്കുമെന്ന് നഗരസഭ ചെയർമാൻ വി. ആർ. പ്രവീജ് വാർത്താസമ്മേളനത്തിൽ അറിയിച്ചു.

4 ഘട്ടങ്ങളിലായി 4 ലക്ഷം രൂപ ഗുണഭോക്താക്കൾക്ക് ലഭിക്കുന്ന പദ്ധതിയിൽ ഒന്നരലക്ഷം രൂപ കേന്ദ്രസർക്കാർ വിഹിതവും അൻപതിനായിരം രൂപ സംസ്ഥാനസർക്കാർ വിഹിതവും ശേഷിക്കുന്ന 2 ലക്ഷം നഗരസഭാ വിഹിതവുമാണ്. 53 കോടിരൂപ ആദ്യഘട്ട ചിലവ് വരുന്ന പദ്ധതിയിൽ 26.5 കോടി രൂപ നഗരസഭയാണ് കണ്ടെത്തുന്നത്. ഈ തുക കണ്ടെത്തുന്നതിനായി ഹഡ്‌കോയിൽനിന്ന് ലോൺ എടുക്കുന്നതിനുള്ള നടപടികൾ പൂർത്തിയായി. ജനുവരി അവസാനത്തോടെ ലോൺ തുക ലഭിക്കും.

1325 ഗുണഭോക്താക്കൾക്ക് പുറമേ 288 കുടുംബങ്ങളെക്കൂടി പദ്ധതിയിൽ ഉൾപ്പെടുത്തുന്നതിന്റെ നടപടികൾ പുരോഗമിച്ചുവരുന്നു. ഈ ഗുണഭോക്താക്കൾക്കുകൂടി അംഗീകാരം ലഭിച്ചാൽ നഗരസഭയിലെ പി എം എ വൈ ലൈഫ് പദ്ധതി ഗുണഭോക്താക്കളുടെ എണ്ണം 1613 ആവും.

ഈ പദ്ധതി കൂടാതെ ഭവനരഹിതരായ എസ് ടി വിഭാഗത്തിൽപ്പെട്ട 367 ഗുണഭോക്താക്കൾക്ക് പട്ടികവർഗ്ഗ വികസന വകുപ്പ് നിർമ്മിക്കുന്ന വീടുകളുടെ നിർമ്മാണവും അവസാന ഘട്ടത്തിലാണ്. പലവിധ കാരണങ്ങളാൽ പ്രവൃത്തി പൂർത്തീകരിക്കാതെ കിടന്ന 452 ഭവനങ്ങൾ ലൈഫ് മിഷന്റെ ഭാഗമായി പൂർത്തീകരിച്ചു.

ആഗസ്ത് മാസത്തിലുണ്ടായ കാലവർഷക്കെടുതിയിൽ ഭൂമിയും വീടും നഷ്ടപ്പെട്ട 78 കുടുംബങ്ങൾക്ക് ഭൂമിയും വീടും നൽകുന്നതിനുള്ള പ്രവർത്തനങ്ങളും ത്വരിതഗതിയിൽ നടന്നുവരികയാണ്. മാനന്തവാടി നഗരസഭയിലെ വിവിധ ഇടങ്ങളിലായി 2 ഏക്കർ 27 സെന്റ് സ്ഥലം വിവിധ വ്യക്തികളും സംഘടനകളും സൗജന്യമായി ലഭ്യമാക്കിയിട്ടുണ്ട്.

ബുധനാഴ്ച രാവിലെ 10 മണിക്ക് നായനാർ സ്മാരക ടൗൺഹാളിൽ നഗരസഭാ ചെയർമാൻ വി.ആർ പ്രവീജിന്റെ അദ്ധ്യക്ഷതയിൽ ഒ.ആർ കേളു എം.എൽ.എ പൂർത്തീകരിച്ച ഭവനങ്ങളുടെ താക്കോൽ കൈമാറും. സബ് കളക്ടർ എൻ.എസ്.കെ ഉമേഷ് നഗരസഭയ്ക്ക് സൗജന്യമായി ലഭ്യമായ ഭൂമിയുടെ രേഖ കൈമാറൽ ചടങ്ങും നടത്തും.

വാർത്താ സമ്മേളനത്തിൽ നഗരസഭ വൈസ് ചെയർപേഴ്‌സൺ ശോഭ രാജൻ,വികസനകാര്യ സ്റ്റാന്റിംഗ് കമ്മിറ്റി ചെയർമാൻ പി.ടി.ബിജു, ക്ഷേമകാര്യ സ്റ്റാന്റിംഗ് കമ്മിറ്റി ചെയർപേഴ്‌സൺ ശാരദ സജീവൻ, പൊതുമരാമത്ത് സ്റ്റാന്റിംഗ് കമ്മറ്റി ചെയർപേഴ്‌സൺ ലില്ലി കുര്യൻ എന്നിവർ പങ്കെടുത്തു