മാനന്തവാടി: മാനന്തവാടി മുനിസിപാലിറ്റി ഡിജിറ്റൽ മുൻസിപ്പാലിറ്റിയായി. പൊതുജനങ്ങൾക്ക് സേവനങ്ങൾ ഇനി വിരൽ തുമ്പിൽ ലഭ്യമാകും. പുതിയതായി രൂപീകരിച്ച 28 മുനിസിപ്പാലിറ്റികളുടെ വെബ്‌സൈറ്റുകൾ കഴിഞ്ഞ ദിവസം തദ്ദേശ സ്വയം ഭരണ വകുപ്പ് മന്ത്രി എ.സി. മൊയ്തീൻ ഉദ്ഘാടനം ചെയ്തിരുന്നു. ഓപ്പൺ സോഴ്‌സ് സാങ്കേതികവിദ്യ ഉപയോഗിച്ച് ഏകീകൃത വെബ് പ്ലാറ്റ് ഫോമിൽ തയ്യാറാക്കിയ 28 പുതിയ നഗരസഭകളുടെ വെബ് സൈറ്റുകളാണ് മന്ത്രി വിവിധ വകുപ്പ് മേധാവികളുടെ സാന്നിദ്ധ്യത്തിൽ തദ്ദേശ സ്ഥാപനങ്ങൾക്ക് സമർപ്പിച്ചത്. ഇൻഫർമേഷൻ കേരളാ മിഷനാണ് വെബ് സൈറ്റുകൾ രൂപകൽപ്പന ചെയ്തത്.
സിവിൽ രജിസ്‌ട്രേഷൻ വിവരങ്ങൾ, വിവിധ അപേക്ഷ ഫോറങ്ങൾ, സാമൂഹ്യസുരക്ഷാ പെൻഷൻ വിവരങ്ങൾ, വിവിധ ലൈസൻസിനുള്ള അപേക്ഷകൾ നൽകൽ, കെട്ടിട നിർമ്മാണ അപേക്ഷകൾ, സർക്കാർ ഉത്തരവുകൾ, ടെണ്ടറുകൾ എന്നിവയുടെ സേവനം പൊതുജനങ്ങൾക്ക് ലഭിക്കും. കൂടാതെ മുനിസിപ്പാലിറ്റിയിലെ ജനസംഖ്യ, തിരഞ്ഞെടുക്കപ്പെട്ട കൗൺസിലർമാരുടെ വിവരങ്ങൾ എന്നിവയും ലഭിക്കും. വിവിധ സർക്കാർ സേവനങ്ങളലേക്കുള്ള ലിങ്കുകളും ഈ വെബ്‌സെറ്റിൽ ലഭ്യമാണ്. വെബ്‌സൈറ്റ് വിലാസം.
https://mananthavadymunicipality.lsgkerala.gov.in/en