തിരുവനന്തപുരം: നവോത്ഥാന മൂല്യങ്ങൾ സംരക്ഷിക്കുന്നതിനായി കേരളത്തിൽ നടത്തിയ വനിതാ മതിൽ ചരിത്ര വിജയമാണെന്ന് മുഖ്യമന്ത്രി പിണറായി വിജയൻ പറഞ്ഞു. വനിതാ മതിൽ വിജയിപ്പിച്ച കേരളത്തിലെ സ്ത്രീ സമൂഹത്തിന് അഭിവാദ്യം അർപ്പിക്കുന്നുവെന്നും രാജ്യം കണ്ട ഏറ്റവും വലിയ മുന്നേറ്റമാണിതെന്നും അദ്ദേഹം കൂട്ടിച്ചേർത്തു.

എല്ലാ കണക്കുകൂട്ടലുകളെയും തെറ്റിച്ച് ജാതി-മത-രാഷ്ട്രീയ വ്യത്യാസമില്ലാതെ കേരളത്തിലെ സ്ത്രീസമൂഹം ഒന്നാകെ വനിതാ മതിലിനൊപ്പം നിന്നു. യാഥാസ്ഥികവർഗീയ ശക്തികൾക്ക് വലിയൊരു താക്കീതാണ് വനിതാമതിൽ. കേരളത്തിലെ സ്ത്രീസമൂഹം പുരോഗമന ചിന്തക്കൊപ്പമാെണന്ന് മഹാവിളംബരമായി വനിതാ മതിൽ മാറിയെന്നും മുഖ്യമന്ത്രി വ്യക്തമാക്കി. സത്രീകൾക്ക് ഭരണഘടന ഉറപ്പുനൽകുന്ന അവകാശങ്ങൾ സംരക്ഷിക്കാനും ലിംഗനീതി നിഷേധിക്കാനുളള കടന്നാക്രമണങ്ങളെ പ്രതിരോധിക്കാനും സ്ത്രീകൾ നടത്തിയ മുന്നേറ്റമാണ് വനിതാമതിലെന്നും അദ്ദേഹം കൂട്ടിച്ചേർത്തു.

വനിതാ മതിൽ സമാനതകളില്ലാത്ത സ്ത്രീമുന്നേറ്റമാക്കുന്നതിന് പിന്തുണ നൽകിയ സാമൂഹികരാഷ്ട്രീയ പ്രസ്ഥാനങ്ങളെയും മുഖ്യമന്ത്രി അഭിനന്ദിച്ചു. എതിർപ്പുകളെയും അപവാദ പ്രചാരണങ്ങളെയും അവഗണിച്ച് വനിതാ മതിലിൽ അണിചേർന്ന സ്ത്രീസമൂഹം കേരളത്തിന്റെ അന്തസ്സും അഭിമാനവും ഉയർത്തിയെന്ന് മുഖ്യമന്ത്രി പറഞ്ഞു.