തിരുവനന്തപുരം: ശബരിമലയിൽ പ്രവേശിച്ച ബിന്ദു, കനകദുർഗ എന്നിവരെ ആക്ഷേപിച്ച് മാദ്ധ്യമങ്ങൾക്ക് മുന്നിൽ അഭിപ്രായ പ്രകടനം നടത്തിയ ബി.ജെ.പി. സംസ്ഥാന ഉപാദ്ധ്യക്ഷൻ ശിവരാജനെതിരെ കേരള വനിതാ കമ്മിഷൻ സ്വമേധയാ കേസെടുത്തു.

സ്ത്രീത്വത്തെ അപമാനിച്ച ശിവരാജന്റെ പ്രസ്താവനയിൽ വനിതാ കമ്മിഷൻ ശക്തമായ പ്രതിഷേധം രേഖപ്പെടുത്തി. ബിന്ദു, കനകദുർഗ എന്നിവരെ ജാതീയമായി ആക്ഷേപിച്ചും സ്ത്രീത്വത്തെ അങ്ങേയറ്റം അപമാനിക്കുന്ന രീതിയിലുമാണ് ശിവരാജൻ കഴിഞ്ഞ ദിവസം മാദ്ധ്യമങ്ങൾക്ക് മുന്നിൽ അഭിപ്രായപ്രകടനം നടത്തിയത്.

ഭരണഘടന ഉറപ്പ് നൽകുന്ന സ്ത്രീകളുടെ അന്തസും പദവിയുമാണ് ഈ അഭിപ്രായ പ്രകടനത്തിലൂടെ ചോദ്യം ചെയ്യപ്പെട്ടതെന്ന് വനിതാ കമ്മിഷൻ അദ്ധ്യക്ഷ എം.സി.ജോസഫയ്ൻ പറഞ്ഞു. സുപ്രീംകോടതിയുടെ നിലപാടിന് വിരുദ്ധമായാണ് ഈ അഭിപ്രായപ്രകടനം നടത്തിയത്. ഉന്നത പദവിയിലിരിക്കുന്ന രാഷ്ട്രീയ നേതാക്കൾ ഈ വിധം അഭിപ്രായങ്ങൾ പ്രകടിപ്പിക്കുന്നതിൽ ശക്തമായി പ്രതിഷേധിക്കുന്നുവെന്നും എം.സി.ജോസഫെയ്ൻ പറഞ്ഞു.