നടി ഗൗതമി നായർ സംവിധായികയായി അരങ്ങേറ്റം കുറിക്കുന്ന വൃത്തത്തിലെ പ്രധാന സാങ്കേതിക പ്രവർത്തകരെല്ലാം വനിതകളാണ്. ഛായാഗ്രഹണം , സംഗീതം, കലാസംവിധാനം, മേക്കപ്പ്, വസ്ത്രാലങ്കാരം, ശബ്ദ സംവിധാനം, ഗാനരചന തുടങ്ങിയ മേഖലകളിലാണ് വനിതകൾ മേൽനോട്ടം വഹിക്കുന്നത്.
ബോളിവുഡ് ഛായാഗ്രാഹകൻ നീരവ് ഷായുടെ അസോസിയേറ്റായിരുന്ന ശരണ്യ ചന്ദറാണ് ഛായാഗ്രഹണം നിർവഹിക്കുന്നത്. പ്രശസ്ത കലാസംവിധായകൻ സുനിൽ ബാബുവിന്റെ അസോസിയേറ്റായിരുന്ന അശ്വനി കാലേ കലാസംവിധാനം നിർവഹിക്കുന്നു. സിങ് സൗണ്ട് സവിത നമ്രതും മേക്കപ്പ് മിട്ടാ ആന്റണിയും നിർവഹിക്കുന്നു. ഡോ . എസ് . നിർമ്മലാ ദേവിയുടെ വരികൾക്ക് നേഹ എസ്. നായർ സംഗീതമൊരുക്കുന്നു.
വസ്ത്രാലങ്കാരം സ്റ്റെഫി സേവ്യർ. സണ്ണിവയ്ൻ നായകനാകുന്ന വൃത്തത്തിന്റെ ചിത്രീകരണം ജനുവരി രണ്ടിന് തിരുവനന്തപുരത്തുതുടങ്ങി. ട്രിവാൻഡ്രം ടാക്കീസിന്റെ ബാനറിൽ ഒലിവിയ സൈറ റൈജുവാണ് ചിത്രം നിർമ്മിക്കുന്നത്. വിമാനം എന്ന ചിത്രത്തിലൂടെ ശ്രദ്ധേയയായ ദുർഗാകൃഷ്ണയാണ് നായിക. അനൂപ് മേനോൻ , സൈജു കുറുപ്പ് എന്നിവരാണ് മറ്റ് താരങ്ങൾ. ക്രൈം ഡ്രാമ വിഭാഗത്തിൽപ്പെടുന്ന ചിത്രമാണ് വൃത്തം . കെ.എസ് . അരവിന്ദ്, ഡാനിയേൽ സായൂജ് നായർ എന്നിവർ ചേർന്നാണ് തിരക്കഥയൊരുക്കുന്നത്. സെക്കൻഡ് ഷോ , ചാപ്റ്റേഴ്സ് , കൂതറ , ഡയമണ്ട് നെക്ലേസ് , കാമ്പസ് ഡയറി തുടങ്ങിയ ചിത്രങ്ങളിൽ ഗൗതമി നായികയായിരുന്നു. ആദ്യ ചിത്രമായ സെക്കൻഡ് ഷോയുടെ സംവിധായകൻ ശ്രീനാഥ് രാജേന്ദ്രനാണ് ഗൗതമിയുടെ ഭർത്താവ്.