ന്യൂ‌ഡൽഹി: ലോക്സഭ തെരഞ്ഞെടുപ്പിൽ മത്സരിക്കുമെന്ന് പ്രഖ്യാപിച്ച നടൻ പ്രകാശ് രാജിന് ആം ആദ്മി പാർട്ടി പിന്തുണ നൽകും. പ്രകാശ് രാജിന്റെ രാഷ്ട്രീയ പ്രവേശനത്തെ പിന്തുണയ്ക്കുന്നതായി ആം ആദ്മി പാർട്ടി നേതാവ് മനീഷ് സിസോദിയ പറഞ്ഞു.
ആം ആദ്മി പാർട്ടി പ്രവർത്തകരും മനീഷ് സിസോദിയയും തമ്മിൽ ബെംഗലുരുവിൽ കൂടിക്കാഴ്ച നടത്തി.
ആംആദ്മി പാർട്ടിയുടെ കർണാടക സംസ്ഥാന കൺവീനർ പ്രീത്വി റെഡ്ഡിയുടെ സാന്നിധ്യത്തിലായിരുന്നു കൂടിക്കാഴ്ച. പ്രകാശ് രാജിന് തുറന്ന പിന്തുണ നൽകുന്നതായി പാർട്ടി ഔദ്യോഗിക ട്വിറ്റർ പേജിൽ അറിയിച്ചു. സ്ഥാനാർത്ഥിയാകാനുളള തന്റെ തീരുമാനത്തെ പിന്തുണച്ച ആംആദ്മി പാർട്ടിക്ക് പ്രകാശ് രാജ് നന്ദി അറിയിച്ചു.
ഇക്കഴിഞ്ഞ ചൊവ്വാഴ്ചയാണ് ലോക്സഭാ തിരഞ്ഞെടുപ്പിൽ മത്സരിക്കുമെന്ന് പ്രകാശ് രാജ് വ്യക്തമാക്കിയത്. കർണാടകയിൽ നിന്ന് മത്സരിക്കുമെന്നാണ് സൂചനകൾ. എന്നാൽ ഏതു മണ്ഡലത്തിൽ നിന്നാവും പ്രകാശ് രാജ് ജനവിധി തേടുന്നതെന്ന് പ്രഖ്യാപിച്ചിട്ടില്ല.
നരേന്ദ്രമോദിയെയും കേന്ദ്രസർക്കാരിനെയും തുറന്നെതിർക്കുന്ന പ്രകാശ്‌രാജിന്
കേരളത്തിലെ ഇടതുപക്ഷ പ്രസ്ഥാനങ്ങളുമായും അടുത്ത ബന്ധമുണ്ട്. തെലുങ്കാന രാഷ്ട്ര സമിതിയും പ്രകാശ് രാജിന് പിന്തുണ അറിയിച്ചിരുന്നു.