 ഏപ്രിൽ-ഡിസംബറിൽ വർദ്ധന 14.1%

ന്യൂഡൽഹി: കേന്ദ്ര സർക്കാരിന്റെ പ്രത്യക്ഷ നികുതി വരുമാനം നടപ്പു സാമ്പത്തിക വർഷം ഏപ്രിൽ-ഡിസംബർ കാലയളവിൽ 14.1 ശതമാനം വർദ്ധിച്ചു. 8.74 ലക്ഷം കോടി രൂപയാണ് ഈയിനത്തിൽ സർക്കാർ സമാഹരിച്ചത്. നികുതിദായകർക്കുള്ള റീഫണ്ട് ഇനത്തിൽ 1.30 ലക്ഷം കോടി രൂപ വിതരണം ചെയ്‌തുവെന്നും 17 ശതമാനമാണ് വർദ്ധനയെന്നും ധനമന്ത്രാലയം വ്യക്തമാക്കി.

റീഫണ്ടിന് കിഴിച്ചുള്ള പ്രത്യക്ഷ നിതുതി വരുമാനം 7.43 ലക്ഷം കോടി രൂപയാണ്. വർദ്ധന 13.6 ശതമാനം. നടപ്പു സാമ്പത്തിക വർഷം പ്രത്യക്ഷ നികുതി വരുമാനമായി സമാഹരിക്കാൻ ബഡ്‌ജറ്റിൽ കേന്ദ്രസർക്കാർ ലക്ഷ്യമിടുന്നത് 11.50 ലക്ഷം കോടി രൂപയാണ്. ഇതിന്റെ 64.7 ശതമാനം ഏപ്രിൽ-ഡിസംബറിൽ ശേഖരിച്ചു.