ബൈസിക്കിൾ തീവ്സ്, സൺ ഡേ ഹോളി ഡേ എന്നീ രണ്ട് ചിത്രങ്ങൾ മതി ജിസ് ജോയി എന്ന സംവിധായകനെ വിലയിരുത്താൻ. ആസിഫ് അലി നായകനായ ഇരു ചിത്രങ്ങളും പ്രേക്ഷകർ ഇരുകൈയും നീട്ടി സ്വീകരിച്ചവയാണ്. ബൈസിക്കിൾ തീവിസ് എന്ന് ചിത്രം കണ്ട് നടൻ ദിലീപ് തന്നോട് പറഞ്ഞ ചില കാര്യങ്ങൾ പ്രേക്ഷകരുമായി പങ്കുവയ്‌ക്കുകയാണ് ജിസ് ജോയി. ഒരു ദൃശ്യമാദ്ധ്യമത്തിന് നൽകിയ അഭിമുഖത്തിലായിരുന്നു ജിസ് ഇക്കാര്യം വ്യക്തമാക്കിയത്.
'ഏഴെട്ട് മാസങ്ങൾക്ക് മുമ്പ് ലാൽ മീഡിയയിൽ വച്ച് ദിലീപേട്ടനെ കാണാനിടയായി. അദ്ദേഹത്തെ കണ്ട് ഞാൻ ഓടി ചെന്നു. സംസാരിക്കുന്നതിനിടയിൽ ദിലീപേട്ടൻ ബൈസിക്കിൾ തീവ്സിനെ കുറിച്ചും സംസാരിച്ചു. 'എടാ ഞാൻ വളരെ വൈകിയാണ് ചിത്രം കണ്ടത്. ഞാൻ എനിക്ക് അടുപ്പമുള്ള റൈറ്റേഴ്‌സിനോടും ഡയറക്‌ടേഴിസിനോടുമെല്ലാം ഇതിനെക്കുറിച്ച് സംസാരിച്ചു. ഒരുവിധപെട്ട സിനിമകളുടെ ഇന്റർവെല്ലും ക്ളൈമാക്‌സുമൊക്കെ ഞാൻ പ്രഡിക്‌ട് ചെയ്യാറുണ്ട്. ഒട്ടുമിക്കവാറും അങ്ങനെ തന്നെയാണ് വരാറുള്ളത്. എന്നാൽ നിന്റെ ചിത്രം എന്നെ ഞെട്ടിച്ചു കളഞ്ഞു'. ദിലീപേട്ടന്റെ ആ വാക്കുകൾ ഏറെ സന്തോഷം തരുന്നതായിരുന്നു'- ജിസ് പറയുന്നു.
2013ൽ പുറത്തിറങ്ങിയ ചിത്രതതിൽ അപർണ ഗോപിനാഥായിരുന്നു നായിക. സിദ്ദിഖ്, സലിം കുമാർ, കെ.പി.എ.സി ലളിത, സൈജു കുറിപ്പ് എന്നിവരാണ് പ്രധാന വേഷങ്ങളിൽ എത്തിയത്. ആസിഫ് അലി തന്നെ നായകനാകുന്ന വിജയ് സൂപ്പറും പൗർണമിയുമാണ് ജിസ് ജോയിയുടെ പുതിയ ചിത്രം. ഐശ്വര്യ ലക്ഷി നായികയാകുന്ന ചിത്രം ഉടൻ റിലീസിനെത്തും.