എരുമേലി: വാവര് പള്ളിയിൽ സ്ത്രീകൾ അടക്കം ആർക്കും പ്രവേശിക്കാൻ യാതൊരുവിലക്കുമില്ലെന്ന് മഹല്ല് കമ്മിറ്റി പ്രസിഡന്റ് അഡ്വ. പി.എച്ച് ഷാജഹാൻ അറിയിച്ചു. യുവതി പ്രവേശനം അനുവദിച്ചുള്ള സുപ്രീം കോടതി വിധി വന്നതിന് മുൻപോ ശേഷമോ സ്ത്രീകൾക്ക് യാതൊരുവിധ വിലക്കും നിയന്ത്രണങ്ങളും ഏർപ്പെടുത്തിയിട്ടില്ലെന്നും അദ്ദേഹം അറിയിച്ചു. വാർത്താ കുറിപ്പിലാണ് മഹല്ല് കമ്മിറ്റി ഇക്കാര്യം വ്യക്തമാക്കിയത്.

സുപ്രീം കോടതി വിധിക്കും വളരെ കാലം മുൻപേ തന്നെ വാവർ പള്ളിയിൽ സ്ത്രീകൾ എത്താറുണ്ടായിരുന്നു. പള്ളിയ്ക്കുള്ളിൽ കയറി വലം വച്ച ശേഷമാണ് തീർത്ഥാടകർ പമ്പയിലേക്ക് പോയിരുന്നത്. വാവർ പള്ളിയിലെത്തുന്ന എല്ലാ വിശ്വാസികൾക്കും അവരുടെ വിശ്വാസത്തിനനുസരിച്ചുള്ള ആചാരനുഷ്ഠാനങ്ങൾ തുടരാമെന്നും പള്ളി അധികൃതർ അറിയിച്ചു.