ദുബായ്: ലോക്സഭ തിരഞ്ഞെടുപ്പിന് മാസങ്ങൾ മാത്രം അവശേഷിക്കവെ വിജയ തന്ത്രങ്ങൾ മെനഞ്ഞ് കോൺഗ്രസ് അദ്ധ്യക്ഷൻ രാഹുൽ ഗാന്ധി. തിരഞ്ഞെടുപ്പിലെ പൂർണവിജയം ലക്ഷ്യമിട്ട് ഞെട്ടിക്കുന്ന വാഗ്ദ്ധാനങ്ങൾ പ്രഖ്യാപിക്കാൻ കോൺഗ്രസ് ഒരുങ്ങുന്നതെന്നാണ് റിപ്പോർട്ട്. കേന്ദ്രത്തിൽ കോൺഗ്രസ് അധികാരത്തിലെത്തിയാൽ വിദേശത്തു മരിക്കുന്ന ഇന്ത്യക്കാരുടെ മൃതദേഹം സൗജന്യമായി നാട്ടിലെത്തിക്കുമെന്ന പ്രഖ്യാപനത്തിനാണ് കോൺഗ്രസ് ഒരുങ്ങുന്നത്. ഇക്കാര്യം തിരഞ്ഞെടുപ്പ് പ്രകടന പത്രികയിൽ ഉൾപ്പെടുത്തുമെന്നും രാഹുലിന്റെ ഗൾഫ് സന്ദർശനവേളയിൽ പ്രഖ്യാപിക്കുമെന്നാണ് കോൺഗ്രസ് വൃത്തങ്ങൾ നൽകുന്ന വിവരം.

പ്രവാസികളുടെ മൃതദേഹം നാട്ടിലേക്ക് കൊണ്ടുപോകുന്നതിന് ഭാരം കണക്കാക്കി ചാർജ് ഈടാക്കുന്ന രീതിയായിരുന്നു മുമ്പ് ഉണ്ടായിരുന്നത്. എന്നാൽ പിന്നീട് നിരക്ക് ഏകീകരിച്ച് എയർ ഇന്ത്യ ഉത്തരവിറക്കിയിരുന്നു. എന്നാൽ ഇതിനെതിരെയും ശക്തമായ പ്രതിഷേധം ഉയർന്നിരുന്നു. ഇതിനിടെയാണ് തിരഞ്ഞെടുപ്പിൽ അധികാരം ലക്ഷ്യമിട്ട് കോൺഗ്രസ് പുതിയ തന്ത്രം മുന്നോട്ട് വയ്ക്കുന്നത്.

ലോക്‌സഭ തിരഞ്ഞെടുപ്പ് പ്രകടനപത്രികയിൽ ഇക്കാര്യം ഉൾപ്പെടുത്തും. ഈ മാസം 11, 12 തീയതികളിൽ ദുബായ്, അബുദാബി സന്ദർശിക്കുന്ന രാഹുൽ ഗാന്ധി ഇതു സംബന്ധിച്ച പ്രഖ്യാപനം നടത്തിയേക്കും. പ്രസാവി കുടുംബങ്ങളുടെ വോട്ടിൽ ലക്ഷ്യമിട്ടാണ് കോൺഗ്രസ് ഇപ്പോൾ ഇക്കാര്യങ്ങൾ മുന്നോട്ടു വയ്ക്കുന്നത്. മരണശേഷവും പ്രവാസികളെ ചൂഷണം ചെയ്യുന്ന കേന്ദ്രനിലപാട് അവസാനിക്കണമെന്നാണ് കോൺഗ്രസ് മുന്നോട്ട് വയ്ക്കുന്ന ആവശ്യം.നിലവിൽ പാകിസ്ഥാൻ, ബംഗ്ലാദേശ് തുടങ്ങിയ രാജ്യങ്ങളിൽ മൃതദേഹങ്ങൾ സൗജന്യമായാണ് നാട്ടിലെത്തിക്കുന്നത്.