കൊച്ചിയിൽ നടി ആക്രമിക്കപ്പെട്ടതുമായി ബന്ധപ്പെട്ട് ദിലീപിനെതിരെ ആരോപണങ്ങൾ ഉയർന്നപ്പോൾ നടനെ പ്രതിരോധിച്ച കൂട്ടത്തിൽ കുട്ടിക്കൽ ജയചന്ദ്രനുമുണ്ടായിരുന്നു. എന്നാൽ തനിക്ക് വേണ്ടി ധാരാളം ഉപകാരങ്ങൾ ചെയ്‌തു തന്ന ദിലീപിനൊപ്പം നിൽക്കാൻ മാത്രമെ തനിക്ക് കഴിയുകയുള്ളുവെന്ന് പറയുകയാണ് നടനും അവതാരകനുമായ ജയചന്ദ്രൻ. ഒരു മാസികയ്‌ക്ക് നൽകിയ അഭിമുഖത്തിലായിരുന്നു താരത്തിന്റെ വെളിപ്പെടുത്തൽ.
'ദിലീപ് കുറ്റാരോപിതനായപ്പോൾ അദ്ദേഹത്തിനൊപ്പം നിന്ന സിനിമ നടനാണ് ഞാൻ. അതിന് ശേഷം ഫോണിലൂടെയും ഓൺലൈൻ മീഡിയയിലൂടെയും നിരവധി പരിഹാസങ്ങൾ ഏറ്റുവാങ്ങേണ്ടി വന്നു. എന്തൊക്കെ പ്രശ്നം ഉണ്ടെങ്കിലും ദിലീപ് എനിക്ക് എങ്ങനെയായിരുന്നുവെന്ന് മാത്രമാണ് ഞാൻ നോക്കിയത്. ആ മനുഷ്യനെ കുറിച്ചുള്ള വ്യക്തിപരമായ അഭിപ്രായം മാത്രമേ ഞാൻ പറഞ്ഞിട്ടുള്ളു.
അദ്ദേഹം വിളിച്ചതിനാൽ നിരവധി ചിത്രങ്ങളിൽ ചെറുതും വലുതുമായിട്ടുള്ള കഥാപാത്രങ്ങൾ എനിക്ക് കിട്ടിയിട്ടുണ്ട്. അതിന്റെ നന്ദി ആ സമയത്ത് കാണിക്കാതിരിക്കാൻ കഴിഞ്ഞില്ല. ദിലീപിൽ നിന്ന് എന്നെക്കാൾ സൗഭാഗ്യം നേടിയ പലരും മിണ്ടാതിരിക്കുന്ന കാലമാണത്. കടന്ന് വന്ന വഴി മറക്കുന്നതിൽ പരം നന്ദികേടുണ്ടോ'- ജയചന്ദ്രൻ ചോദിക്കുന്നു.