പാട്ന: പാട്നയിൽ പതിനാറുകാരിയുടെ മുഖത്ത് ആസിഡ് ഒഴിച്ച് കഴുത്തറുത്ത് കൊലപ്പെടുത്തി. പാട്​നയിൽ നിന്ന്​ 111 കിലോമീറ്റർ അകലെ ഗയയിലാണ്​ സംഭവം. പെൺകുട്ടിയെ ബലാത്സംഘം ചെയ്‌താണ് കൊലപ്പെടുത്തിയതെന്ന് കുടുംബം ആരോപിക്കുന്നു. എന്നാൽ, ദുരഭിമാനക്കൊലയാണെന്നാണ്​ പൊലീസിന്റെ നിഗമനം. സംഭവത്തിൽ വൻ പ്രതിഷേധമാണ് പ്രദേശത്ത് നടക്കുന്നത്. പൊലീസിൽ പരാതി നൽകിയിരുന്നെങ്കിലും പ്രതിയെ പിടികൂടാൻ സാധിച്ചിട്ടില്ല.

ഡിസംബർ 28നാണ്​ പെൺകുട്ടിയെ വീട്ടിൽ നിന്ന്​ കാണാതായത്​. ജനുവരി ആറിന്​ വീടിനു സമീപത്ത് അഴുകിയ നിലയിൽ പെൺകുട്ടിയുടെ മൃതദേഹം കണ്ടെത്തി. പെൺകുട്ടിയെ കാണാതായ ഉടൻ പരാതി നൽകിയിട്ടുണ്ടെന്ന്​ കുടുംബവും പറഞ്ഞു. എന്നാൽ, നാലു ദിവസം കഴിഞ്ഞാണ്​ പരാതിപ്പെട്ടതെന്ന്​ പൊലീസ് വ്യക്തമാക്കി. ദുരഭിമാനക്കൊലയാണെന്ന്​ പൊലീസ്​ ആരോപിക്കുന്നതായി കുടുംബം പറഞ്ഞു. പെൺകുട്ടി ഡിസംബർ 31ന്​ തിരികെ എത്തിയെന്ന്​ മാതാവും സഹോദരിമാരും പറഞ്ഞതായി ഗയയിലെ മുതിർന്ന പൊലീസ്​ ഉദ്യോഗസ്​ഥൻ രാജീവ്​ മിശ്ര വ്യക്​തമാക്കി.

പെൺകുട്ടി തിരിച്ചെത്തിയ ദിവസം രാത്രി പത്തിന്​ കുട്ടിയുടെ പിതാവ്​ അവർക്കറിയുന്ന ഒരാളുടെ കൂടെ അവളെ പറഞ്ഞയച്ചു. കുട്ടിയെ കൊണ്ടുപോയ ആളെ പൊലീസ്​ പിടികൂടിയിട്ടുണ്ട്​. എന്നാൽ, കൊലപാതകത്തിൽ പങ്കുണ്ടെന്ന്​ ഇയാൾ സമ്മതിച്ചിട്ടില്ല. പ്രതികളെന്ന്​ സംശയിക്കുന്നവരുമായി ഇയാൾ ബന്ധപ്പെട്ടിട്ടുണ്ടെന്നാണ്​ ഫോൺ വിവരങ്ങൾ നൽകുന്ന സൂചന. പെൺകുട്ടി ബലാൽസംഗത്തിനിരയായോ ഇല്ലയോ എന്നറിയാനായി പോസ്​റ്റ്​മോർട്ടം റിപ്പോർട്ടിന്​ കാത്തിരിക്കുകയാണെന്നും പൊലീസ്​ വ്യക്​തമാക്കി.