സിനിമയിൽ ഡയലോഗ് എഴുതുന്നവർ ഇപ്പോൾ ഡബ്ല്യു.സി.സിയെ (വിമെൻ ഇൻ സിനിമ കളക്‌ടീവ്) പേടിച്ചു തുടങ്ങിയിട്ടുണ്ടെന്ന് നടി റിമ കല്ലിംഗൽ. തിരുവനന്തപുരത്ത് സൂര്യ ഫെസ്‌റ്റിവലിൽ സംസാരിക്കവെയാണ് റിമ ഇക്കാര്യം വ്യക്തമാക്കിയത്. ഇത്രയും വലുതായ ഒരു മൂവി ഇൻഡസ്‌ട്രിക്ക് നടപ്പിലാക്കേണ്ടതായ ഒരു മാനുവൽ ഇല്ല എന്നുള്ളതാണ് സത്യമെന്നും അത് കൊണ്ടുവരാനുള്ള ശ്രമത്തിലാണ് ഡബ്ല്യു.സി.സിയെന്നും റിമ വ്യക്തമാക്കി.
'ഫിലിം ഫെസ്‌റ്റിവൽ, അവാർഡ് നിശ തുടങ്ങിയവയും സ്വന്തമായി തന്നെ നടത്താൻ ഡബ്ല്യു.സി.സി ആലോചിക്കുന്നുണ്ട്. സുഡാനി ഫ്രം നൈജീരിയ എഴുതിയ മുഹസിൽ പാലേരി ഒരിക്കൽ എന്നോട് പറഞ്ഞത് ഡയലോഗ് എഴുതുമ്പോൾ ആലോചിക്കേണ്ടത് ഡബ്ല്യു.സി.സിയ്‌ക്ക് ഓകെ ആയിരിക്കുമോ എന്നാണല്ലോ എന്നാണ്. ഞങ്ങളെ ചന്തപ്പെണ്ണ് എന്ന് വിളിക്കുന്നത് കൊണ്ട് ഒരു കുഴപ്പവുമില്ല. അതൊരു കോംപ്ളിമെന്റായാണ് കാണുന്നത് '- റിമ പറഞ്ഞു.