ന്യൂഡൽഹി: കരൺജോഹറിന്റെ ചാറ്റ് ഷോയിൽ സ്ത്രീവിരുദ്ധമായ പരാമർശം നടത്തിയതിൽ ക്രിക്കറ്റ് താരങ്ങളായ കെ.എൽ.രാഹുലിനെയും ഹാർദിക് പാണ്ഡ്യയെയും പുറത്താക്കിയതിനെ തുടർന്ന് ആസ്ട്രേലിയക്കെതിരായ ഏകദിന പരമ്പരയ്‌ക്കുള്ള ഇന്ത്യൻ ടീമിൽ ശുഭ്മാൻ ഗില്ലിനെയും വിജയ് ശങ്കറിനെയും ഉൾപ്പെടുത്തി. ബി.സി.സി.ഐയാണ് ഇക്കാര്യം അറിയിച്ചത്. അതേസമയം, വിജയ് ശങ്കർ മാത്രമായിരിക്കും ആസ്ട്രേലിയൻ പര്യടനത്തിൽ ടീമിനൊപ്പം ചേരുക. ഗിൽ ന്യൂസിലന്റിനെതിരായ പരമ്പരയിലായിരിക്കും ടീമിലെത്തുക. ശുഭ്മാൻ ഗിൽ ആദ്യമായാണ് ഇന്ത്യൻ ടീമിലെത്തുന്നത്. വിജയ് ശങ്കർ ശ്രീലങ്കൻ പര്യടനത്തിൽ ഇന്ത്യൻ ടീമിനൊപ്പമുണ്ടായിരുന്നു. ആസ്ട്രേലിയക്കെതിരായ പരമ്പരയിലെ ആദ്യ മത്സരം തോറ്റ ഇന്ത്യയ്‌ക്ക് ഇനിയുള്ള രണ്ട് ഏകദിനങ്ങളും നിർണായകമാണ്.
രാഹുലിനും പാണ്ഡ്യയ്‌ക്കുമെതിരെയുള്ള അച്ചടക്ക നടപടിയുടെ ഭാഗമായാണ് സസ്‌പെൻഡ് ചെയ്‌തത്. ഇവർക്കെതിരെ ബി.സി.സി.ഐ അന്വേഷണം നടക്കുകയാണ്. അന്വേഷണം പൂർത്തിയാകുന്നതുവരെയാണ് സസ്‌പെൻഷനെന്ന് നേരത്തെ ബി.സി.സി.ഐ ഇടക്കാല ഭരണസമിതി അറിയിച്ചിരുന്നു. ഭരണ സമിതി അംഗം ഡയാന എഡുൽജി സസ്‌പെൻഷൻ അംഗീകരിച്ചതോടെയാണ് ബി.സി.സി.ഐ അച്ചടക്ക നടപടി ഔദ്യോഗികമായി പ്രഖ്യാപിച്ചത്. കെ.എൽ.രാഹുലിനെ ആദ്യ ഏകദിനത്തിനുള്ള ടീം സെലക്ഷനിൽ പരിഗണിക്കില്ലെന്നും പാണ്ഡ്യ ടീമിലുണ്ടാകില്ലെന്നും ബി.സി.സി.ഐ വ്യക്തമാക്കിയിരുന്നു.
ഇരുവരോടും ബി.സി.സി.ഐ ഇടക്കാല ഭരണസമിതി വിശദീകരണം ചോദിച്ചിരുന്നു. വിശദീകരണത്തിൽ ഇടക്കാല ഭരണസമിതി തൃപ്‌തരായിരുന്നില്ല. തുടർന്ന് ഇരുവരേയും രണ്ട് ഏകദിനങ്ങളിൽ നിന്ന് സസ്‌പെൻഡ് ചെയ്യണമെന്ന് സമിതി ശുപാർശ ചെയ്‌തിരുന്നു. ബി.സി.സി.ഐയുമായി കരാറുള്ള താരങ്ങൾ ടി.വി ഷോയിൽ പങ്കെടുക്കുന്നതിന് മുൻകൂർ അനുമതി വാങ്ങണമെന്ന് നിബന്ധനയുണ്ട്.