സന്നിധാനം: സംസ്ഥാന സർക്കാരിന്റെ ഈ വർഷത്തെ ഹരിവരാസനം പുരസ്കാരം ഗായിക പി.സുശീലക്ക് സമ്മാനിച്ചു. ഒരു ലക്ഷം രൂപയും പ്രശസ്തിപത്രവും അടങ്ങുന്നതാണ് പുരസ്കാരം. മകരവിളക്ക് ദിനമായ ജനുവരി 14ന് സന്നിധാനത്ത് ദേവസ്വം മന്ത്രി കടകംപള്ളി സുരേന്ദ്രനാണ് പുരസ്കാരം ഗായികയ്ക്ക് നൽകിയത്. ദേവസ്വം പ്രസിഡന്റ് എ.പദ്മകുമാർ,​ തമിഴ് നടൻ ജയം രവി എന്നിവരും സന്നിഹിതരായിരുന്നു.

ഹരിവരാസനം പുരസ്കാരത്തിന് അർഹയായ ഗായിക പി.സുശീല രാവിലെ സന്നിധാനത്ത് എത്തിയിരുന്നു. പുരസ്കാരം ലഭിച്ചതിൽ വളരെ സന്തോഷമുണ്ടെന്ന് പി.സുശീല പറഞ്ഞു. ഈ അവാർഡ് ഭഗവാൻ തനിക്ക് സമ്മാനിച്ചതാണ്. സന്നിധാനത്തേക്ക് വരാനും ദർശനം നടത്താനും ഭഗവാൻ അവസരം നൽകിയതാണെന്നും പി.സുശീല കൂട്ടിച്ചേർത്തു. ആദ്യമായാണ് സന്നിധാനത്ത് എത്തുന്നത് അതിനാൽ വലിയ സന്തോഷമുണ്ടെന്നും ഗായിക വ്യക്തമാക്കി.

2012മുതലാണ് ഹരിവരാസനം പുരസ്കാരം നൽകി വരുന്നത്. കെ.ജെ.യേശുദാസ്,​ ജയവിജയ,​ പി.ജയചന്ദ്രൻ,​ എസ്.പി.ബാലസുബ്രമണ്യം,​ എം.ജി ശ്രീകുമാർ,​ ഗംഗൈ അമരൻ,​ കെ.എസ് ചിത്ര എന്നിവരാണ് മുൻ വർഷങ്ങളിൽ പുരസ്കാരം നേടിയത്. ശബരിമല ഉന്നതാധികാര സമിതി അധ്യക്ഷൻ ജസ്റ്റിസ് സിരിജഗൻ, ദേവസ്വം കമീഷണർ എൻ വാസു, ദേവസ്വം പ്രിൻസിപ്പൽ സെക്രട്ടറി കെ ആർ ജ്യോതിലാൽ എന്നിവരടങ്ങിയ പുരസ്‌കാര നിർണയ സമിതിയാണ് ജേതാവിനെ തിരഞ്ഞെടുത്തത്.