ന്യൂഡൽഹി: ടെലിവിഷൻ ഉപഭോക്താക്കൾക്ക് കേബിൾ ടിവി, ഡി.ടി.എച്ച് വഴി ജി.എസ്.ടി അടക്കം 153.40 രൂപയ്ക്ക് 100 ചാനലുകൾ കാണാനുള്ള ബേസ് പാക്കേജ് ടെലികോം റെഗുലേറ്ററി അതോറിട്ടി (ട്രായ്) പ്രഖ്യാപിച്ചു. ഇഷ്ട ചാനലുകൾ 31ന് മുൻപ് ഉപഭോക്താക്കൾ തിരഞ്ഞെടുക്കണം. പാക്കേജ് ഫെബ്രുവരി ഒന്നിന് നിലവിൽ വരും. ഡിസംബർ 29ന് പുതിയ രീതിയിലേക്ക് മാറണമെന്നാണ് ആദ്യം ട്രായ് നിർദ്ദേശിച്ചിരുന്നത്. എന്നാൽ കേബിൾ ടിവി, ഡി.ടി.എച്ച് കമ്പനികൾക്ക് മുന്നൊരുക്കത്തിനുള്ള സമയം കിട്ടിയില്ലെന്ന കാരണത്താലാണ് ഒരു മാസത്തേയ്ക്ക് പദ്ധതി നീട്ടിവച്ചത്. ഇതിനകം തന്നെ പ്രാദേശിക തലത്തിലെ കേബിൾ കമ്പനികൾ പദ്ധതി നടപ്പിലാക്കാൻ തീരുമാനിച്ചിട്ടുണ്ട്.

ബേസ് പാക്കേജിൽ ഹൈ ഡെഫിനിഷൻ (എച്ച്.ഡി) ചാനലുകൾ ഉൾപ്പെടുന്നില്ല. എന്നാൽ ഒരു എച്ച്.ഡി ചാനൽ രണ്ട് എസ്.ഡി ചാനലുകൾക്ക് തുല്യമായി കണക്കാക്കി ഉപഭോക്താക്കൾക്ക് തിരഞ്ഞെടുക്കാൻ കഴിയുമെന്ന് ചാനൽ രംഗത്തുള്ളവർ പറയുന്നു. കേബിൾ ടിവി, ഡി.ടി.എച്ച് കമ്പനികളാണ് അന്തിമ തീരുമാനമെടുക്കേണ്ടത്.

കൂടാതെ, പേ ചാനലിന്റെ പരമാവധി നിരക്ക് 19 രൂപയായി ട്രായ് നിശ്ചയിച്ചിട്ടുണ്ട്. ചാനലുകൾക്ക് ഒന്നിച്ച് ബൊക്കെയായി വിലയിട്ട് പ്രേക്ഷകനു മേൽ അടിച്ചേല്പിക്കാനാകില്ല. ബൊക്കെയിൽ ഇഷ്ടമുള്ള ചാനൽ മാത്രം തിരഞ്ഞെടുത്ത് കാണാൻ കഴിയുമെന്നും പത്രക്കുറിപ്പിൽ പറയുന്നു.