കമൽഹാസൻ ചിത്രമായ 'ഇന്ത്യൻ 2' ന്റെ ഫസ്റ്റ‌്‌ലുക്ക് പോസ്റ്റർ പുറത്തുവിട്ടു. പൊങ്കൽ ആശംസകൾ നേർന്ന് സംവിധായകൻ ശങ്കർ തന്നെയാണ് ട്വിറ്ററിലൂടെ പോസ്റ്റർ പുറത്തുവിട്ടത്. അനീതിക്കെതിരെ വിരൽ ചൂണ്ടുന്ന പഴയ സേനാപതിയെ തന്നെയാണ് പോസ്റ്റ‌റിൽ കാണാൻ കഴിയുക.

22വർഷങ്ങൾക്ക് മുൻപ് പുറത്തിറങ്ങിയ ഇന്ത്യൻ എന്ന ചിത്രത്തിന്റെ രണ്ടാം ഭാഗമാണിത്. ചിത്രത്തിൽ കാജൽ അഗർവാളാണ് കമലിന്റെ നായികയായി എത്തുന്നത്. ബോളിവുഡ് താരം അജയ് ദേവ്ഗൺ ചിത്രത്തിൽ പ്രധാന വേഷത്തിലെത്തുന്നു എന്നതാണ് മറ്റൊരു പ്രത്യേകത.

#indian2 Hi everyone! “ Happy Pongal” pic.twitter.com/rgiuCBBtLq

— Shankar Shanmugham (@shankarshanmugh) January 14, 2019

രാഷ്ട്രീയ പ്രവേശനം നടത്തുന്ന കമലഹാസന്റെ അഭിനയ ജീവിതത്തിലെ അവസാന ചിത്രമായിരിക്കും ഇൻഡ്യൻ2 എന്നാണ് സൂചനകൾ. തമിഴിന് പുറമെ ഹിന്ദി,​ തെലുങ്ക് ഭാഷകളിലും ചിത്രം പുറത്തിറങ്ങുന്നുണ്ട്. ആദ്യ ചിത്രത്തിന്റെ ക്ലൈമാക്സിൽ തന്നെ രണ്ടാം ഭാഗത്തിനുള്ള സൂചന നൽകിയാണ് ചിത്രം പൂർത്തിയാകുന്നത്. പഴയ ചിത്രത്തിലുള്ള കഥാപാത്രങ്ങൾ പുതിയ ചിത്രത്തിലും ഉണ്ടോ എന്ന് വ്യക്തമല്ല.

എ.ആർ റഹ്മാൻ തന്നെയാണ് രണ്ടാം ഭാഗത്തിനും സംഗീതം ഒരുക്കുന്നത്. സാബു സിറിൾ കലാസംവിധാനം നിർവ്വഹിക്കും. രവിവർമ്മനാണ് ഛായാഗ്രഹണം. നിരവധി ചിത്രങ്ങളിലെ ആക്ഷൻ രംഗങ്ങളിലൂടെ പ്രേക്ഷകരെ ഞെട്ടിച്ച പീറ്റർ ഹെയ്നാണ് ചിത്രത്തിന് സംഘട്ടനം ഒരുക്കുന്നത്. 200കോടി രൂപ ബഡ്ജറ്റിലാണ് ഇന്ത്യൻ2 ഒരുക്കുന്നത്.