ഒല്ലൂർ: മാന്ദാമംഗലം സെൻറ്​ മേരീസ്​ യാക്കോബായ സുറിയാനി പള്ളിയിൽ യാക്കോബായ- ഓർത്തഡോക്സ്​ വിഭാഗക്കാർ ഏറ്റുമുട്ടിയതിനെതുടർന്ന് പ്രദേശത്ത് സംഘർഷാവസ്ഥ.. വ്യാഴാഴ്​ച രാത്രി പതിനൊന്നരയോടെയാണ് സംഭവം. കല്ലേറിൽ നിരവധി പേർക്ക് പരിക്കേറ്റു. പള്ളിയുടെ ജനൽ ചില്ലുകളും തകർന്നിട്ടുണ്ട്.

ഓർത്തഡോക്സ്​ വിഭാഗത്തിന് പ്രാർത്ഥനാ സ്വാതന്ത്ര്യം നിഷേധിച്ചെന്നാരോപിച്ച് ബുധനാഴ്ച ഭദ്രാസനാധിപ​​​​െൻറ നേതൃത്വത്തിൽ പള്ളിക്കു പുറത്ത് കുത്തിയിരിപ്പ് സമരം തുടങ്ങിയിരുന്നു. യാക്കോബായ വിഭാഗം പള്ളിക്കകത്ത് പ്രാർത്ഥനാ സമരവും നടത്തുന്നുണ്ട്. ഇതിനിടെയാണ് . ഒരു വിഭാഗം വിശ്വാസികൾ ഗേറ്റ്​ തുറന്നതിന്​ പിന്നാലെ പള്ളിയിൽ നിന്നും കല്ലേറ്​ ഉണ്ടായത്. പിന്നാലെ തിരിച്ചും കല്ലേറുണ്ടായി.

വ്യാഴാഴ‌്ച രാത്രി ഓർത്തഡോക‌്സ‌് വിഭാഗക്കാർ പള്ളിക്കുള്ളിലേക്ക‌് കയറാൻ ശ്രമിച്ചതാണ‌് സംഘർഷത്തിന‌് കാരണമെന്ന‌ും ഇതര ജില്ലകളിൽ നിന്നുള്ളവരാണ് പള്ളി ആക്രമിച്ചതെന്നും യാക്കോബായ വിഭാഗം ആരോപിച്ചു. അതേസമയം, യാക്കോബായ വിഭാഗം സമരപന്തൽ പൊളിച്ചതാണ് സംഘർഷത്തിനിടയാക്കിയതെന്നാണ് ഓർത്തഡോക്സ്​ വിഭാഗത്തിന്‍റെ ആരോപണം.

കുത്തിയിരിപ്പ് സമരം നടത്തിയ മലങ്കര ഓർത്തഡോക്സ്​​ തൃശൂർ ഭദ്രാസനാധിപൻ യൂഹാനോൻ മാർ മിലിത്തിയോസിനുൾപ്പെടെ കല്ലേറിൽ പരിക്കേറ്റിട്ടുണ്ട്.