കോട്ടയം: ജോസ്. കെ. മാണി രാജ്യസഭാംഗമായതോടെ ലോക്സഭാ തിരഞ്ഞെടുപ്പിൽ കോട്ടയം മണ്ഡലത്തിൽ കേരള കോൺഗ്രസ് മാണി ഗ്രൂപ്പിൽ നിന്ന് ആര് മത്സരിക്കുമെന്നാണ് ഏവരും ഉറ്റുനോക്കുന്നത്. പാർട്ടി നേതാക്കളിൽ ചിലർ സീറ്റ് നോട്ടമിട്ടിട്ടുണ്ടെങ്കിലും ആർക്കാണ് നറുക്ക് വീഴുക എന്ന് വ്യക്തമല്ല. കോട്ടയം സീറ്റ് കോൺഗ്രസിന് വച്ചുമാറുമെന്ന പ്രചാരണം ഉണ്ടെങ്കിലും നേതാക്കൾ തള്ളിക്കളയുന്നു. മുൻമുഖ്യമന്ത്രി ഉമ്മൻചാണ്ടി മത്സരിക്കുമെന്നാണ് മറ്റൊരു പ്രചാരണം. എന്നാൽ, പാർലമെന്റിലേക്ക് മത്സരിക്കാനില്ലെന്ന് ഉമ്മൻചാണ്ടി പറയുന്നുണ്ടെങ്കിലും പ്രചാരണത്തിന് കുറവില്ല. ഉമ്മൻചാണ്ടി മത്സരിച്ചാൽ പകരം ഇടുക്കി സീറ്റ് മാണി ഗ്രൂപ്പിന് നൽകും. എന്നാൽ, ഇതൊന്നും നേതാക്കൾ സ്ഥിരീകരിക്കുന്നില്ല.
കഴിഞ്ഞ ദിവസം ചേർന്ന യു.ഡി.എഫ് യോഗത്തിൽ കോട്ടയം കൂടാതെ മറ്റൊരു സീറ്റ് കൂടി വേണമെന്ന് മാണി ഗ്രൂപ്പ് ആവശ്യപ്പെട്ടിട്ടുണ്ട്. ഇടുക്കിയോ ചാലക്കുടിയോ ആണ് രണ്ടാമത്തെ സീറ്റായി പാർട്ടി ആഗ്രഹിക്കുന്നതെന്നാണ് സൂചന.
പേരുകൾ പലത്
കോട്ടയം സീറ്രിൽ മാണി ഗ്രൂപ്പിൽ നിന്ന് വർക്കിംഗ് ചെയർമാൻ പി.ജെ. ജോസഫ് എം.എൽ.എ, ജോസ്. കെ. മാണി എം.പിയുടെ ഭാര്യ നിഷ ജോസ് എന്നിവരുടെ പേരുകളും ഉയരുന്നുണ്ട്. അതേസമയം, ഇടുക്കി സീറ്റ് കിട്ടിയാൽ അവിടെ പി.ജെ. ജോസഫ് മത്സരിക്കുമെന്നും കോട്ടയത്ത് സാദ്ധ്യത കുറവാണെന്നും പറയപ്പെടുന്നു. ഇതുകൂടാതെ മറ്റുചില പേരുകളും കോട്ടയത്ത് മാണിഗ്രൂപ്പിൽ നിന്ന് ഉയരുന്നുണ്ട്. സ്ഥാനാർത്ഥി മോഹവുമായി ചില നേതാക്കൾ അണിയറ നീക്കവും ശക്തമാക്കിയിട്ടുണ്ട്.
ഇടതിലും തീരുമാനമായില്ല
കഴിഞ്ഞ തിരഞ്ഞെടുപ്പിൽ ജനതാദൾ എസിനായിരുന്നു കോട്ടയം സീറ്റ്. മുൻമന്ത്രി മാത്യു ടി. തോമസായിരുന്നു സ്ഥാനാർത്ഥി. ഇക്കുറി ദളിന് കോട്ടയത്തിന് പകരം പത്തനംതിട്ട കിട്ടിയാൽ കൊള്ളാമെന്ന ആഗ്രഹമുണ്ടത്രേ. അങ്ങനെയെങ്കിൽ ജില്ലാ സെക്രട്ടറി വി.എൻ.വാസവനെ സി.പി.എം കോട്ടയത്ത് മത്സരിപ്പിക്കുമെന്നാണ് അറിയുന്നത്. ഇടതുമുന്നണിയിൽ നിന്ന് കേരള കോൺഗ്രസ് ഫ്രാൻസിസ് ജോർജ് വിഭാഗം കോട്ടയത്തിനായി അവകാശവാദം ഉന്നയിക്കുമെന്നും സൂചനയുണ്ട്.
പോരാട്ടം കടുപ്പിക്കാൻ ബി.ജെ.പി
ശബരിമല വിഷയം പ്രചാരണായുധമാക്കാൻ ലക്ഷ്യമിടുന്ന ബി.ജെ.പി കോട്ടയത്ത് ശക്തമായ മത്സരത്തിനാണ് കളമൊരുക്കുന്നത്. കഴിഞ്ഞ തവണ മത്സരിച്ച നോബിൾ മാത്യു വീണ്ടും മത്സരിക്കാനുള്ള സാദ്ധ്യത ഉണ്ടെന്നും പറയപ്പെടുന്നു. എന്നാൽ, എൻ.ഡി.എ ഘടകകക്ഷിയായ കേരള കോൺഗ്രസ് പി.സി. തോമസ് വിഭാഗം കോട്ടയം സീറ്റ് ആവശ്യപ്പെട്ടേക്കാം. അങ്ങനെവന്നാൽ പി.സി.തോമസ് മത്സരിക്കുമെന്നാണ് സൂചന.