ചാലക്കുടി: കൈക്കൂലിക്കേസിൽ ചാലക്കുടിയിലെ ജി.എസ്.ടി ഓഫീസ് സൂപ്രണ്ടിനെ സി.ബി.ഐ അറസ്റ്റ് ചെയ്‌തു. നടത്തറ കൈനൂർ വീട്ടിൽ കണ്ണൻ (45) ആണ് അറസ്റ്റിലായത്. സൗത്ത് ജംഗ്ഷനിലെ ഗോകുലം കാറ്ററിംഗ് ഉടമ സത്യനിൽ നിന്നും ഒരു ലക്ഷം രൂപ കൈക്കൂലി വാങ്ങുന്നതിനിടെ നഗരത്തിലെ പ്രമുഖ ഹോട്ടലിൽ വച്ചാണ് ഇയാൾ പിടിയിലായത്. തനിക്ക് പണം വേണമെന്ന് ആവശ്യപ്പെട്ട് കാറ്ററിംഗ് ഉടമയെ ഇയാൾ നിരന്തരം ഭീഷണിപ്പെടുത്തിയിരുന്നു. ഒടുവിൽ പണം നൽകാമെന്ന് സമ്മതിച്ച ഉടമ വിവരം സി.ബി.ഐയെ അറിയിക്കുകയായിരുന്നു.

15 ലക്ഷം രൂപയുടെ ജി.എസ്.ടി അടയ്‌ക്കണമെന്നും ഇതിൽ നിന്ന് ഒഴിവാക്കുന്നതിന് അഞ്ചു ലക്ഷം രൂപ നൽകിയാൽ മതിയെന്നും സൂപ്രണ്ട് വാഗ്ദ്ധാനം ചെയ്തു. എന്നാൽ രണ്ടു ലക്ഷം രൂപ നൽകാമെന്ന് കാറ്ററിംഗ് ഉടമ സമ്മതിച്ചു. ഇതുപ്രകാരം കൊരട്ടിയിൽ വച്ച് പണം നൽകാമെന്നായിരുന്നു ഉടമ്പടി. വൈകിട്ട് അഞ്ചോടെ ഉടമയെ ഫോണിൽ വിളിച്ച സൂപ്രണ്ട് ചാലക്കുടി റെയിൽവേ സ്റ്റേഷൻ റോഡിലുള്ള ഹോട്ടലിൽ എത്തണമെന്ന് നിർദേശിച്ചു. വിവരം അറിയിച്ചതിനെ തുടർന്ന് എറണാകുളം വിംഗിൽ നിന്നെത്തിയ സി.ബി.ഐ ഉദ്യോഗസ്ഥർ കൈക്കൂലിയിലെ ആദ്യ ഗഡുവായ ഒരു ലക്ഷം രൂപ കൈമാറുമ്പോൾ സൂപ്രണ്ടിനെ കൈയ്യോടെ പിടികൂടുകയായിരുന്നു.