കൊച്ചി: കോൺഗ്രസിൽ ചേർന്നുവെന്ന പ്രചാരണങ്ങളിലെ സത്യാവസ്ഥ തുറന്നു പറഞ്ഞ് നടി മഞ്ജുവാര്യർ രംഗത്തെത്തി.​ തന്റെ രാഷ്ട്രീയ പ്രവേശനത്തെക്കുറിച്ച് പ്രചരിക്കുന്ന വാർത്തകൾ പൂർണമായും തെറ്റാണെന്ന് മ‌ഞ്ജുവാര്യർ പ്രതികരച്ചു.

ലോക്സഭാ തെരഞ്ഞെടുപ്പിന്റെ പശ്ചാത്തലത്തിൽ താൻ കോൺഗ്രസുമായി ചേർന്ന് പ്രവർത്തിക്കാൻ താത്പര്യം പ്രകടിപ്പിച്ചു എന്ന വാർത്തകളിൽ സത്യമില്ല. ഒരു രാഷ്ട്രീയകക്ഷിയുടെയും ഭാഗമായി ഒരിക്കലും പ്രവർത്തിക്കാൻ ആഗ്രഹിക്കുന്നില്ല എന്നും താരം പറഞ്ഞു.

ഒരു രാഷ്ട്രീയ കക്ഷിയുടെയും ഭാഗമാകാൻ ആഗ്രഹിക്കുന്നില്ല. ഏതെങ്കിലും രാഷ്ട്രീയ പാർട്ടിയോട് വിധേയത്വമോ ആഭിമുഖ്യമോ പ്രകടിപ്പിക്കുന്നില്ല. ഇപ്പോൾ പുറത്തു വന്നിരിക്കുന്ന വാർത്ത പൂർണമായും തെറ്റാണ്. താനിപ്പോൾ ഹൈദരാബാദിൽ ഷൂട്ടിംഗിലാണ് ഉളളത്. രാഷ്ട്രീയ പ്രവേശനം സംബന്ധിച്ചോ, സ്ഥാനാർത്ഥിത്വം സംബന്ധിച്ചോ ചർച്ച ചെയ്യാൻ ആരും തന്നെ ബന്ധപ്പെട്ടിട്ടില്ലെന്നും മഞ്ജു വാര്യർ വ്യക്തമാക്കി.

നേരത്തെ ഇടതുപക്ഷത്തിന്റെ നേതൃത്വത്തിൽ സംഘടിപ്പിച്ച വനിതാ മതിലിന്റെ പ്രചാരണ വീഡിയോയിൽ പ്രത്യക്ഷപ്പെട്ട മഞ്ജു പിന്നീട് താൻ വനിതാ മതിലിൽ നിന്ന് പിൻവാങ്ങുകയാണെന്ന് അറിയിച്ചിരുന്നു. വനിതാ മതിലിന്റെ പിന്നിൽ രാഷ്ട്രീയമുണ്ടെന്നാരോപിച്ചായിരുന്നു മഞ്ജു അന്ന് പിൻവാങ്ങിയത്.