ജക്കാർത്ത: ഇന്തൊനേഷ്യ മാസ്റ്റേഴ്സ് ബാഡ്മിന്റൺ കിരീടം ഇന്ത്യൻ താരം സൈന നെഹ്‌വാളിന്. ഫൈനലിൽ ലോക ചാംപ്യനും ഒളിംപിക് ചാംപ്യനുമായ കരോലിനാ മാരിൻ പരിക്കുകളെ തുടർന്ന് പിന്മാറിയതിനെ തുടർന്ന് സൈനയെ വിജയിയായി പ്രഖ്യാപിക്കുകയായിരുന്നു.

നേരത്തെ ക്വാർട്ടറിൽ പി.വി സിന്ധുവിനെ മാരിൻ തോൽപ്പിച്ചിരുന്നു. സ്പാനിഷ് താരമായ മാരിൻ ടൂർണമെന്റിൽ അഞ്ചാം സീഡും സൈന എട്ടാം സീഡുമാണ്. ഇരുവരും തമ്മിലുള്ള 11 മത്സരങ്ങളിൽ മാരിൻ ആറും സൈന അഞ്ചും കളി വീതം ജയിച്ചിട്ടുണ്ട്. എന്നാൽ അവസാനം കളിച്ച 2 മത്സരത്തിലും സൈനയെ മാരിൻ തോൽപ്പിച്ചിരുന്നു. 2009ലും 2010ലും 2012ലും സൈന ഇന്തൊനേഷ്യയിൽ ചാംപ്യനായിട്ടുണ്ട്‌.