സോഷ്യൽ മീഡിയയിൽ മിക്ക യുവ സിനിമാ നായികമാരെയും വനിതാ കായിക താരങ്ങളെയും ഉൾപ്പെടെയുള്ള വനിതകളെ പരിഹസിക്കുന്നതിനെതിരെയുള്ള യുവതിയുടെ ഫേസ്ബുക്ക് പോസ്റ്റ് ചർച്ചയാകുന്നു. മലയാളികളുടെ വികൃതമായ മനോഭാവത്തെ തന്റെ ഫേസ്ബുക്ക് കുറിപ്പിലൂടെ പൊളിച്ചെഴുതുകയാണ് സരിത അനൂപ് എന്ന യുവ എഴുത്തുകാരി.

'കുട്ടൂസ് വിളിയിലൂടെ ശരിക്കും ഒരു താഴ്തിക്കെട്ടലാണ് ഫീൽ ചെയ്യുന്നത്. മുന്നേ ആയിരുനെങ്കിൽ ഏതാ ഈ ചരക്കെന്നു ചോദിക്കുമായിരുന്നു. ഇപ്പൊൾ മലയാളി പ്രബുദ്ധരായി. ചരക്കെന്നു പറയില്ല, സ്ത്രീകളെ അപമാനിക്കലാവുമത്രേ അപ്പൊ എളുപ്പമുണ്ട്, കുട്ടൂസ് എന്ന് വിളിച്ചാൽ സ്നേഹത്തടെയുള്ള വിളിയായി അപ്പോൾ നമ്മുടെ സ്വന്തം എന്ന ഫീലായി'. സരിത ഫേസ്ബുക്കിൽ കുറിച്ചു

മലയാളികളുടെ പുരോഗമനപലരമായ ചിന്തകളെയും സരിത വിമർശിക്കുന്നു. ചില പുരോഗമനവാദികൾ രാഷ്ട്രീയ എതിരാളികളായ സ്ത്രീകളെ കൂട്ടൂസെന്ന് മാത്രമേ വിളിക്കൂ. അതവരെ താഴ്ത്തിക്കെട്ടാനാണെന്നും തിരിച്ച് അവരെ രാഷ്ട്രീയം പറഞ്ഞ് എതിർക്കാനും സരിത ആവശ്യപ്പെടുന്നു. മാത്രമല്ല സിനിമാ മേഖലയിലെ വിവേചനത്തെത്തുറിച്ചും യുവതി ചൂണ്ടിക്കാണിക്കുന്നു.

ഫേസ്ബുക്ക് കുറിപ്പിന്റെ പൂർണ്ണരൂപം

ഫേസ്ബുക്കിലെ ഏറ്റവും അരോചകരമായ ഒരു ട്രെണ്ട് ആണ് ഈ കുട്ടൂസ് വിളി. ഏതൊരു രംഗത്തെയും കഴിവും പ്രാഗത്ഭ്യവും തെളിയിച്ച സ്ത്രീകളെ സൌന്ദര്യം മാത്രം നോക്കി വിളിക്കുന്ന അങ്ങേയറ്റം സെക്സിസ്റ്റ് ഏർപ്പാട്. IPS ആവട്ടെ രാഷ്ട്രീയനേതാവ് ആവട്ടെ സിനിമാനടി ആവട്ടെ ഒരു കുട്ടൂസ് വിളിയിലൂടെ അത് വരെ അവര്‍ നേടിയതൊക്കെ അവരുടെ സൗന്ദര്യത്തിന്റെ പുറകിലായി. സ്‌മൃതി മന്ദാനയെക്കുറിച്ചുള്ള ഒരു പോസ്റ്റിൽ സ്‌മൃതി കുട്ടൂസ് എന്നു സംബോധന ചെയ്ത് അഭിനന്ദിക്കുന്നത് അങ്ങേയറ്റം സെക്സിസ്റ്റ് ഏർപ്പാടാണ്..

ഒരു നാലഞ്ചു വർഷമായി മലയാളികള്ക്ക് വന്ന ഒരു പൊളിറ്റിക്കൽ 'കറക്റ്റനസ് സിൻഡ്രോമി'ന്റെ ഭാഗമായുള്ള വിളി കൂടെയാണിത് ചിലപ്പോഴൊക്കെ. AICC spokesperson ആയ ഒരു dentist നെ കുറിച്ചുളള ചർച്ചയിലാണ് ഇന്ന് രാവിലെ കണ്ടത് ഈ കുട്ടൂസ് ഏതെന്നു. കുട്ടൂസ് വിളിയിലൂടെ ശരിക്കും ഒരു താഴ്തിക്കെട്ടലാണ് ഫീൽ ചെയ്യുന്നത്. മുന്നേ ആയിരുനെങ്കിൽ ഏതാ ഈ ചരക്കെന്നു ചോദിക്കുമായിരുന്നു. ഇപ്പൊ മലയാളി പ്രബുദ്ധരായി. ചരക്കെന്നു പറയില്ല, സ്ത്രീകളെ അപനമാനിക്കലാവുമത്രേ.. അപ്പൊ എളുപ്പമുണ്ട്, കുട്ടൂസ് എന്ന് വിളിച്ചാ‍ൽ, സ്നേഹത്തോടെ ഉള്ള വിളിയായി, നമ്മുടെ സ്വന്തം എന്ന feel ആത്രേ അപ്പൊ. രണ്ടു കൊണ്ടും ഉദ്ദേശിച്ചത് ഒന്ന് തന്നെ എന്ന് ആർകും മനസ്സിലാവുകയും ഇല്ല.

പിന്നെ അടുത്ത കൂട്ടർ, അങ്ങേയറ്റം പുരോഗമനവാദികളാണ്. ഇവർക്ക് അറിയാം ഈ വിളിയിലെ പ്രശ്നം. അത് കൊണ്ട് രാഷ്ട്രീയ എതിരാളികളായ സ്ത്രീകളെ മാത്രേ ഇവർ കുട്ടൂസ് എന്ന് വിളിക്കൂ. തിരിച്ചു രാഷ്ട്രീയം പറഞ്ഞു എതിർക്കൂ എന്ന് പറഞ്ഞാല്‍, ഏയ് ഞങ്ങൾക്ക് ഇതാണ് ഇഷ്ടം.

സിനിമാ ഗ്രൂപ്പുകളിൽ ആണ് ഏറ്റവും കഷ്ടം...ഏട്ടന്മാരുടെയും ഇക്കമാരുടെയും വിരൾ അനങ്ങിയാൽ വരെ അഭിനയം. പക്ഷെ ഞങ്ങൾക്ക് ഐഷു കുട്ടൂസ്, രജീഷ കുട്ടൂസ്, പേരറിയാത്ത എല്ലാരും ആ കുട്ടൂസ് ഈ കുട്ടൂസ്... അഭിനയോം കഴിവും ഒക്കെ പിന്നെ.