തിരുവനന്തപുരം:രാജ്യത്തിന്റെ സാംസ്‌കാരിക പൈതൃകം തകർക്കുന്നതിന് കൂട്ടുനിൽക്കുന്ന പ്രധാനമന്ത്രി നരേന്ദ്ര മോദിയാണ് കേരളത്തിലെ സർക്കാർ പൈതൃകം തകർക്കുന്നതെന്ന് വിമർശിക്കുന്നതെന്ന് മുഖ്യമന്ത്രി പിണറായി വിജയൻ പറഞ്ഞു. കഴിഞ്ഞ ദിവസം തൃശൂരിൽ മോദി നടത്തിയ പ്രസംഗത്തിന് ബാങ്ക് എംപ്ളോയീസ് ഫെഡറേഷന്റെ 10ാം ദേശീയ കോൺഫറൻസ് ഉദ്ഘാടനം ചെയ്യവെയാണ് മുഖ്യമന്ത്രി മറുപടി നൽകിയത്.

രാജ്യത്തിന്റെ മതനിരപേക്ഷത തകർക്കാനും ക്രൈസ്തവ, മുസ്ളിം സമുദായത്തെ ആക്രമിക്കാനും കൊന്നൊടുക്കാനും സംഘപരിവാറിന് പിന്തുണ നൽകുന്ന മോദിയാണ് കേരളത്തിൽ വന്ന് ഇങ്ങനെയൊക്കെ പറയുന്നത്. ഭരണഘടനാപദവിയിൽ വഹിക്കുന്ന ഒരു വ്യക്തിക്ക് ചേർന്നതാണോ ഇതെന്ന് അദ്ദേഹം ആലോചിക്കണം. കാക്കി നിക്കറും വെള്ള ഷർട്ടുമിടുന്ന പഴയ ആർ.എസ്.എസ് പ്രചാരകനെ പോലെയാണ് മോദി സംസാരിക്കുന്നത്. മതനിരപേക്ഷത സംരക്ഷിക്കാനുള്ള ഉത്തരവാദിത്തം പ്രധാനമന്ത്രിയെന്ന നിലയിൽ മോദി നിറവേറ്റിയോയെന്ന് ആത്മപരിശോധന നടത്തണം.

ഭക്ഷണത്തിന്റെ പേരിലും പശുവിന്റെ പേരിലും മനുഷ്യരെ കൊല്ലുന്ന മാനസികാവസ്ഥയിലേക്ക് രാജ്യത്തെ ചെറുപ്പക്കാരെ എത്തിച്ചത് സംഘപരിവാറാണ്. അവരെ കലർപ്പില്ലാതെ പിന്തുണയ്ക്കാൻ മോദിക്ക് എങ്ങനെ കഴിയുന്നു. കേരളത്തിന്റെ മണ്ണ് ബഹുസ്വരതയുടേതാണ്. ആ മണ്ണിനെ തകർക്കാമെന്ന നിങ്ങളുടെ ആഗ്രഹം ഒരിക്കലും നടക്കാൻ പോകുന്നില്ല. ബി.ജെ.പിയുടെ അനുയായികളാണ് ശബരിമലയിൽ അടക്കം ആക്രമണങ്ങൾ അഴിച്ചുവിട്ടത്. സ്ത്രീകളടക്കമുള്ളവർക്കു നേരെയുണ്ടായ ആ അതിക്രമങ്ങളെയാണ് മോദി എതിർക്കേണ്ടത്. ന്യൂനപക്ഷ, ഭൂരിപക്ഷ വേർതിരിവിന് കേരളത്തെ ഇരയാക്കാനുള്ള സംഘപരിവാർ ശ്രമം നടക്കാതെ വരുന്നതിലുള്ള നിരാശയാണ് മോദിയ്ക്കെന്നും പിണറായി പറഞ്ഞു.

ബെഫി ജനറൽ സെക്രട്ടറി പ്രദീപ് വിശ്വാസ് സ്വാഗതം പറഞ്ഞു. സി.ഐ.ടി.യു ജനറൽ സെക്രട്ടറി തപൻ സെൻ,​ സംസ്ഥാന സെക്രട്ടറി എളമരം കരീം എം.പി,​ എ.ഐ.ഇ.എ ജനറൽ സെക്രട്ടറി രമേഷ്,​ കോൺഫെഡറേഷൻ ഒഫ് സെൻട്രൽ ഗവൺമെന്റ് എംപ്ളോയീസ് ജനറൽ സെക്രട്ടറി കെ.കൃഷ്ണൻ,​ എ.ഐ.എസ്.ജി.ഇ.എഫ് ജോയിന്റ് സെക്രട്ടറി ഹരികൃഷ്ണൻ,​ ബെഫി പ്രസിഡന്റ് നന്ദകുമാർ തുടങ്ങിയവർ പങ്കെടുത്തു.