കൊച്ചി: കേരളത്തിനെ ദുരിതത്തിലാക്കിയ പ്രളയം മനുഷ്യ നിർമ്മിതമാണെന്ന് ചൂണ്ടിക്കാട്ടി ഈ ശ്രീധരൻ ഹെെക്കോടതിയിൽ ഹർജി നൽകി. കേരളത്തിലെ പ്രളയ കാരണം കണ്ടെത്താനും, ഭാവിയിൽ ആവർത്തിക്കാതിരിക്കാനുമുള്ള സമഗ്രപഠനത്തിന് ഉന്നതതല സാങ്കേതിക സമിതി രൂപീകരിക്കണമെന്നാവശ്യപ്പെട്ട് ഡോ. ഇ. ശ്രീധരന്റെ നേതൃത്വത്തിലുള്ള ഫൗണ്ടേഷൻ ഫോർ റെസ്റ്റൊറേഷൻ ഒഫ് നാഷണൽ വാല്യൂസ് എന്ന സംഘടനയയാണ് ഹൈക്കോടതിയിൽ ഹർജി നൽകിയത്.

പ്രളയം മനുഷ്യനിർമ്മിത ദുരന്തമാണെന്ന് സാങ്കേതിക മേഖലയിൽ 65 വർഷത്തെ പ്രവൃത്തി പരിചയമുള്ള ഇ. ശ്രീധരൻ ഉൾപ്പെടെയുള്ളവർ ചൂണ്ടിക്കാട്ടിയിരുന്നു. ഇക്കാര്യത്തിൽ സമഗ്രപഠനം വേണമെന്നാവശ്യപ്പെട്ട് ഹർജിക്കാർ മുഖ്യമന്ത്രിക്കും സംസ്ഥാന പ്ളാനിംഗ് ബോർഡ് വൈസ് ചെയർമാനും ഒക്ടോബർ 30 ന് നിവേദനം നൽകിയെങ്കിലും നടപടിയുണ്ടായില്ല. ദുരന്തം വരും വർഷങ്ങളിലും ആവർത്തിക്കാൻ സാദ്ധ്യതയുണ്ടെന്നും ഹർജിയിൽ പറയുന്നു.

കൃത്യമായ മുൻകരുതൽ എടുത്തില്ലെങ്കിൽ ഇനിയും പ്രളയത്തിന് സമാനമായ ദുരന്തങ്ങൾ ആവർത്തിക്കും. അതുകൊണ്ട് തന്നെ ഉന്നതതല ടെക്നിക്കൽ കമ്മിറ്റി രൂപീകരിച്ച് ദുരന്ത കാരണം അന്വേഷിക്കണമെന്നും അതിന് സർക്കാറിന്റെ പിന്തുണ ഉറപ്പ് വരുത്തണമെന്നും ഹർജിയിൽ ആവശ്യപ്പെടുന്നു. ഹർജി നാളെ ഹെെക്കോടതി പരിഗണിക്കും.