ന്യൂഡൽഹി: രാജ്യത്തെ തൊഴിൽ ലഭ്യതയുമായി ബന്ധപ്പെട്ട സർവ്വേ റിപ്പോർട്ട് കേന്ദ്രസർക്കാർ പ്രസിദ്ധീകരിക്കാത്തതിൽ പ്രതിഷേധിച്ച് നാഷണൽ സ്റ്റാറ്റിസ്റ്റിക്സ് വിഭാഗത്തിലെ രണ്ട് അംഗങ്ങൾ രാജിവച്ചു. സ്വതന്ത്ര അംഗങ്ങളായ പി.സി മോഹനൻ,​ ജെ.വി മീനാക്ഷി എന്നിവരാണ് രാജിവച്ചത്. ഇവരിൽ മോഹനൻ കമ്മിഷന്റെ ആക്ടിംഗ് ചെയർമാനാണ്. തൊഴിൽ ലഭ്യതയുമായി ബന്ധപ്പെട്ട റിപ്പോർട്ട് കഴിഞ്ഞ മാസം തന്നെ തയ്യാറാക്കിയിരുന്നു. എന്നാൽ ഇത് കേന്ദ്രസർക്കാർ പുറത്തുവിട്ടിരുന്നില്ല.

ഇരുവരും രാജിവച്ചതോടെ​ എക്​സ്​ ഒഫീഷ്യോ അംഗങ്ങളായ അമിതാഭ്​​ കാന്തും ചീഫ്​ സ്​റ്റാസ്​റ്റീഷ്യൻ പ്രവീൺ ശ്രീവാസ്​തവയും മാത്രമാണ്​ ഇനി കമ്മീഷനിലുള്ളത്​. കമ്മിഷനിൽ ഫലപ്രദമായി പ്രവർത്തിക്കാൻ സാധിക്കാത്തതിനെ തുടർന്നാണ് രാജിവച്ചതെന്നും റിപ്പോർട്ട് പ്രസിദ്ധീകരിക്കാത്തത് ഒരു കാരണമാണെന്നും പി.സി മോഹനൻ മാദ്ധ്യമങ്ങളോട് പറഞ്ഞു. ജനുവരി 28ന് മോഹനൻ രാജിക്കത്ത് നൽകിയതിന് പിന്നാലെ മീനാക്ഷിയും രാജിവയ്ക്കുകയായിരുന്നു.

അതേസമയം,​ റിപ്പോർട്ട് പ്രസിദ്ധീകരിക്കാനുള്ള അനുമതി കമ്മിഷൻ നൽകിയെങ്കിലും എന്തുകൊണ്ടാണ് പ്രസിദ്ധീകരിക്കാത്തതെന്ന് അറിയില്ലെന്നും മോഹനൻ വ്യക്തമാക്കി. രാജിവച്ചവർക്ക് 2020വരെ കാലാവധിയുണ്ടായിരുന്നു. എന്നാൽ തിരഞ്ഞെടുപ്പ് ആസന്നമായിരിക്കെ ഇരുവരുടെയും രാജി കേന്ദ്രസർക്കാരിന് തിരിച്ചടിയാകുമെന്നാണ് വിലയിരുത്തൽ.