പൊതുവേദിയിൽ സമ്മാനം സ്വീകരിക്കുന്ന ബാലന്റെ ചിത്രം കുറച്ച് ദിവസമായി സോഷ്യൽ മീഡിയയിൽ പ്രചരിക്കുകയാണ്. ചിത്രത്തിലെ ബാലൻ അബ്ദുൾ നാസർ മഅദനിയാണെന്ന് അടിക്കുറിപ്പുണ്ടെങ്കിലും ഫോട്ടോയുടെ വിശ്വാസ്യതയിൽ നിരവധി പേർ സംശയം പ്രകടിപ്പിച്ചിരുന്നു. എന്നാൽ ഈ ഫോട്ടോ തന്റെതാണെന്ന് ഉറപ്പിച്ചു കൊണ്ട് ഫേസ്ബുക്ക് പോസ്റ്റിട്ടിരിക്കുകയാണ് മഅദനി. കൊല്ലം ജില്ലാ കലോത്സവത്തിലെ സമ്മാനദാന ചടങ്ങിൽ നിന്നും പകർത്തിയാതാണ് ഈ ഫോട്ടോ. താൻ ആറാം ക്ലാസിൽ പഠിക്കുമ്പോൾ ജില്ലാ അടിസ്ഥാനത്തിൽ നടന്ന പ്രസംഗമത്സരത്തിൽ ഒന്നാം സ്ഥാനം നേടിയിരുന്നെന്നും അന്നത്തെ കൊല്ലം ജില്ല കളക്ടർ ബാബുജ ജേക്കബിൽ നിന്നാണ് സമ്മാനം സ്വീകരിച്ചതെന്നും അദ്ദേഹം ഫേസ്ബുക്ക് പോസ്റ്റിൽ കുറിക്കുന്നു.
മികച്ച പ്രാംസംഗികനായ മഅദനി തന്റെ പിതാവിനെയാണ് ഗുരുസ്ഥാനീയനായി കാണുന്നത് ഓരോ മത്സരങ്ങൾക്കും പ്രസംഗം പഠിപ്പിച്ച ശേഷം വീട്ടിലെ ഹാളിൽ ഒരു സ്റ്റൂളിന്റെ മുകളിൽ എന്നെ കയറ്റി നിർത്തി പ്രസംഗിപ്പിക്കും മാതാവും അനുജനുമായിരുക്കും ശ്രോതാക്കൾ മത്സരങ്ങൾക്കെല്ലാം പിതാവ് കൂടെ വരുമ്പോൾ മാതാവ് എന്നേക്കാൾ ടെൻഷനോടെ സമ്മാനവുമായി തിരിച്ചുവരുമ്പോഴാണ് ഉമ്മാക്ക് ആശ്വാസമാവുന്നതെന്നും അദ്ദേഹം ഫേസ്ബുക്ക് പോസ്റ്റിൽ കുറിക്കുന്നു.
ഫേസ്ബുക്ക് പോസ്റ്റിന്റെ പൂർണരൂപം
അതെ,ഇതു ഞാൻ തന്നെയാണ്....
കഴിഞ്ഞ കുറേ നാളുകളായി 'മഅദനിയുടെ ചെറുപ്പത്തിലെ ഫോട്ടോ'എന്ന അടിക്കുറിപ്പോടെ ഇങ്ങനെ ഒരു ഫോട്ടോ പ്രചരിക്കുന്നുണ്ട് ഇതിന്റെ വിശ്വാസ്യത ഉറപ്പുവരുത്താൻ പലരും എനിക്ക് ഫോട്ടോ അയച്ചുതന്ന് അന്വഷിക്കുന്നുമുണ്ട്. അതേ, ഈ ഫോട്ടോ എന്റേതു തന്നെയാണ് മൈനാഗപ്പള്ളി മിലദേശരിഫ് ഹൈസ്‌കൂളിൽ ആറാം ക്ലാസ്സ് വിദ്യാർഥിയായിരുക്കുമ്പോൾ കൊല്ലം ജില്ലാ കലോത്സവത്തിൽ ജില്ലാ അടിസ്ഥാനത്തിൽ നടന്ന പ്രസംഗമത്സരത്തിൽ ഒന്നാം സ്ഥാനം കാരസ്ഥമാക്കിയതിനു അന്നത്തെ ജില്ലാകളക്ടർ ശ്രീ ബാബുജ
ജേക്കബ് ആണ് സമ്മാനം നൽകുന്നത്(അദ്ദേഹം പിന്നീട് ചീഫ് സെക്രട്ടറി ആയി റിട്ടയർ ചെയ്തു) എന്റെ പ്രസംഗ രംഗത്തെ ഏക ഗുരു എന്റെ പ്രിയ വാപ്പ അബ്ദുസ്സമദ്മാസ്റ്റർ ആയിരുന്നു ഓരോ മത്സരങ്ങൾക്കും പ്രസംഗം പഠിപ്പിച്ച ശേഷം വീട്ടിലെ ഹാളിൽ ഒരു സ്റ്റൂളിന്റെ മുകളിൽ എന്നെ കയറ്റിനിർത്തി പ്രസംഗിപ്പിക്കും എന്റെ പ്രിയ ഉമ്മായും അനുജനുമായിരുക്കും ശ്രോതാക്കൾ മത്സരങ്ങൾക്കെല്ലാം വാപ്പായും കൂടെയുണ്ടാകും ഉമ്മായ്ക്കായിരിക്കും എന്നേക്കാൾ ടെൻഷൻ സമ്മാനവുമായി തിരിച്ചുവരുമ്പോഴാണ് ഉമ്മാക്ക് ആശ്വാസമാവുക അന്നും എന്നും എന്റെ പ്രിയ ഉമ്മാടെ പ്രാർഥനയായിരുന്നു എന്റെ ശക്തി. എന്റെ പ്രിയ പിതാവിന്റെ ദീർഘായുസിനും എന്റെ ഉമ്മായുടെ പരലോക സന്തോഷത്തിനും ഈ പോസ്റ്റ് കാണുന്ന ഓരോരുത്തരും പ്രാർത്ഥിക്കണം...