ന്യൂഡൽഹി: വികസന പ്രവർത്തനങ്ങൾക്കും തൊഴിലധിഷ്ഠിത പദ്ധതികൾക്കും കേന്ദ്രസർക്കാർ പദ്ധതികൾ മുന്നോട്ടു വയ്‌ക്കുമ്പോഴും ഇവയിൽ ചുരുക്കം ചിലവ മാത്രമാണ് പ്രാവർത്തകമാകുന്നത്. 2017-2018 കാലയളവിൽ 45 വർഷത്തെക്കാളും തൊഴിലില്ലായ്‌മ കൂടുതലാണ്. എൻ.എസ്.എസ്.ഒ(നാഷണൽ സാമ്പിൾ സർവെ ഓ‌ർഗനെെസേഷൻ)യുടേതാണ് കണക്കുകൾ. ഈ കണക്കുകൾ പ്രസിദ്ധീകരിച്ചിരുന്നില്ല. അതുപോലെ കഴിഞ്ഞ ഡിസംബറിൽ നാഷണൽ സ്റ്റാറ്റിസ്റ്റിക്കൽ കമ്മിഷൻ(എൻ.എസ്.സി) അന്വേഷണ റിപ്പോർട്ട് സമർപ്പിച്ചെങ്കിലും റിപ്പോർട്ട് പുറത്തുവിട്ടില്ലായിരുന്നു. 'ബിസിനസ് സ്റ്റാന്റേർ‌ഡാണ്' ഈ വാർത്ത ഇപ്പോൾ പുറത്തു വിട്ടത്. കേന്ദ്രസർക്കാരിന്റെ ഇടക്കാല ബജറ്റ് അവതരിപ്പിക്കുന്നതിനു തൊട്ടു മുമ്പ് റിപ്പോർട്ട് പുറത്തുവിട്ടത് കേന്ദ്ര സർക്കാരിന് വൻ തിരിച്ചടിയാകും. 2011-12ൽ തൊഴിലില്ലായ്‌മ നിരക്ക് 2.2 ശതമാനമായിരുന്നു. 2017-2018ൽ 6.1 ശതമാനമായി. ഗ്രാമ പ്രദേശത്തെക്കാളും നഗര പ്രദേശങ്ങളിലാണ് തൊഴിലില്ലായ്‌മ കൂടുതലുമെന്നാണ് റിപ്പോർട്ടിൽ പറയുന്നത്.
അതേസമയം, രാജ്യത്തെ തൊഴിലും തൊഴിലില്ലായ്മയും വ്യക്തമാക്കുന്ന സ്ഥിതിവിവരക്കണക്ക് പുറത്തുവിടാത്തതിനെ തുടർന്ന് സ്ഥിതിവിവര കമ്മിഷൻ അംഗങ്ങൾ രാജിവെച്ചത് വിവാദമായിരുന്നു. 2017-18ലെ വാർഷിക സർവെ റിപ്പോർട്ട് പ്രസിദ്ധീകരിക്കാതെ പിടിച്ചുവെച്ചതിൽ പ്രതിഷേധിച്ചാണ് ദേശീയ സ്ഥിതിവിവര കമ്മിഷൻ (എൻ.എസ്.സി) ആക്ടിങ് ചെയർപേഴ്സണും അംഗവും രാജിവച്ചത്. തൊഴിൽ സ്ഥിതിവിവര കണക്ക് വിദഗ്ധനായ പി.സി. മോഹനനും പ്രഫസർ ജെ.വി മീനാക്ഷിയുമാണ് രാജിവച്ചത്. നിരവധി ഭരണഘടനാ സ്ഥാപനങ്ങൾ തകർത്ത മോദി സർക്കാർ രാജ്യത്തെ മറ്റൊരു സ്ഥാപനത്തെക്കൂടി നശിപ്പിക്കുകയാണെന്ന് കോൺഗ്രസ് ആരോപിച്ചു.
ദേശീയ സ്ഥിതിവിവര കമ്മിഷന്റെ മരണത്തിൽ അനുശോചിക്കുകയാണെന്ന് മുൻ ധനമന്ത്രികൂടിയായ പി. ചിദംബരം പറഞ്ഞു. വെള്ളം ചേർക്കാത്ത രാജ്യത്തിന്റെ മൊത്ത ആഭ്യന്തര ഉൽപാദനത്തെയും തൊഴിൽ അവസരങ്ങളെയും കുറിച്ച് വെള്ളം ചേർക്കാത്ത സ്ഥിതിവിവരം നൽകാൻ പോരാടിയ കമ്മിഷനെ രാജ്യം ഓ‌ർക്കുമെന്ന് ചിദംബരം കൂട്ടിച്ചേർത്തു. സർക്കാറിനെ രക്ഷിക്കാൻ ദുർഭരണത്തിന്റെ മുഴുവൻ സ്ഥിതിവിവര കണക്കും നശിപ്പിക്കുകയാണ് ചെയ്യുന്നതെന്ന് കോൺഗ്രസ് നേതാവ് അഹമ്മദ് പട്ടേൽ കുറ്റപ്പെടുത്തി. സർക്കാരിന്റേതല്ലാത്ത എല്ലാ സ്വതന്ത്ര അംഗങ്ങളും കമ്മിഷനിൽനിന്ന് രാജിവെച്ചുവെന്ന് അഹമ്മദ് പട്ടേൽ പറഞ്ഞു.