പെരിന്തൽമണ്ണ: ശബരിമല ദർശനം നടത്തിയ കനകദുർഗയെ അങ്ങാടിപ്പുറത്തെ ഭർത്താവിന്റെ വീട്ടിൽ കയറ്റിയില്ല. തുടർന്ന് അതിക്രമത്തിനിരയാവുന്ന വനിതകൾക്ക് താത്കാലിക സംരക്ഷണവും നിയമസഹായവും നൽകുന്ന പെരിന്തൽമണ്ണയിലെ വൺസ്റ്റോപ്പ് സെന്ററിലേക്ക് ഇവരെ മാറ്റി. വനിതാ എസ്‌.ഐയുടെ നേതൃത്വത്തിൽ സുരക്ഷയും ഏർപ്പെടുത്തി. തിങ്കളാഴ്ച രാത്രി എത്തിയ കനകദുർഗയെ വീട്ടിൽ കയറ്റുന്നത് ഭർത്താവ് കൃഷ്ണനുണ്ണി എതിർക്കുകയായിരുന്നു. തുടർന്ന് ഇവരെ പെരിന്തൽമണ്ണ പോലീസ് സ്റ്റേഷനിലെത്തിച്ചു. സി.ഐ ടി.എസ്. ബിനുവിന്റെ നേതൃത്വത്തിൽ കൃഷ്ണനുണ്ണിയും കനകദുർഗയുമായി ചർച്ച നടത്തിയെങ്കിലും തീരുമാനമുണ്ടായില്ല. ശബരിമല ദർശനത്തിനുശേഷം കഴിഞ്ഞ ചൊവ്വാഴ്ച അങ്ങാടിപ്പുറത്തെ വീട്ടിലെത്തിയ കനകദുർഗയെ മർദ്ദനത്തിൽ പരിക്കേറ്റ് കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിരുന്നു. കനകദുർഗ്ഗയുടെ സഹോദരനും ഇവരെ വീട്ടിൽ കയറ്റില്ലെന്ന് അറിയിച്ചിരുന്നു.