തിരുവല്ല: ബിൽഡിംഗ് പെർമിറ്റ് അനുവദിക്കാൻ കൈക്കൂലി വാങ്ങിയ നഗരസഭാ ഓവർസിയറെ വിജിലൻസ് സംഘം പിടികൂടി. തിരുവല്ല നഗരസഭാ എൽ.എസ്.ജി.ഡി ഗ്രെഡ് 2 ഓവർസിയർ നെയ്യാറ്റിൻകര സ്വദേശി കെ. അയ്യപ്പൻ (45) ആണ് അറസ്റ്റിലായത്. തിരുവല്ല കിഴക്കൻ മുത്തൂർ എബനേസർ കെ.കെ. കോശിയുടെ പുതിയ കെട്ടിടത്തിന് പെർമിറ്റ് ലഭിക്കാനായി നഗരസഭയിൽ അപേക്ഷ നൽകിയിരുന്നു. ഇതിന്മേൽ നടപടി സ്വീകരിക്കാതെ കാലതാമസം വരുത്തിയശേഷം കെട്ടിടത്തിന് അനുമതി നല്‌കാനായി ഓവർസിയർ 2000 രൂപ ആവശ്യപ്പെടുകയായിരുന്നു. തുടർന്ന് കോശിയുടെ ബന്ധുവും സഹായിയുമായ രാജു പത്തനംതിട്ട വിജിലൻസ് ഓഫീസിൽ പരാതി നൽകി. വിജിലൻസ് നൽകിയ അഞ്ഞൂറിന്റെ നാല് നോട്ടുകളുമായി രാജു ഇന്നലെ ഉച്ചയ്‌ക്ക്ശേഷം നഗരസഭാ ഓഫീസിലെത്തി അയ്യപ്പന് കൈമാറുകയായിരുന്നു. പണം വാങ്ങി മേശയുടെ ഡ്രോയറിൽ വച്ച് പൂട്ടിയ ഉടൻ സ്ഥലത്തുണ്ടായിരുന്ന വിജിലൻസ് സംഘം പരിശോധന നടത്തി അയ്യപ്പനെ പിടികൂടി. തുടർന്ന് എൻജിനിയറിംഗ് വിഭാഗത്തിൽ ഒരു മണിക്കൂറിലേറെ പരിശോധന നടത്തിയ വിജിലൻസ് സംഘം ഫയലുകൾ പിടിച്ചെടുത്തു. അയ്യപ്പനെ ഇന്ന് തിരുവനന്തപുരം വിജിലൻസ് കോടതിയിൽ ഹാജരാക്കും.