ചാവക്കാട്: ചക്കംകണ്ടം, അങ്ങാടിത്താഴം, ചാവക്കാട് നഗരസഭയിലെ തെക്കൻ പാലയൂർ പ്രദേശത്തെ ജനങ്ങൾ കാലങ്ങളായി അനുഭവിക്കുന്ന മാലിന്യ പ്രശ്‌നത്തിന് ഇതുവരെയും പരിഹാരമില്ലെന്ന് ആരോപിച്ച് പ്രതിപക്ഷ നേതാവ് രമേശ് ചെന്നിത്തലയ്ക്ക് നിവേദനം നൽകി. വിഷയത്തിൽ ഇടപെടണമെന്നും പൗരാവകാശ വേദി നേതാക്കൾ നൽകിയ നിവേദനത്തിലുണ്ട്.
വാട്ടർ അതോറിറ്റി വിതരണം ചെയ്യുന്ന കുടിവെള്ളത്തിൽ കക്കൂസ് മാലിന്യം കലർന്ന് പിഞ്ചു കുട്ടികളടക്കം നിരവധി പേരാണ് ഇക്കഴിഞ്ഞ ദിവസം ആശുപത്രിയിൽ ചികിത്സ തേടിയത്. നിയമ വിരുദ്ധമായി മാലിന്യം ഒഴുക്കുന്ന ലോഡ്ജുകൾക്കും ഹോട്ടലുകൾക്കും മറ്റു കെട്ടിടങ്ങൾക്കുമെതിരെ നിയമപരമായി നടപടിയെടുക്കാൻ ബാദ്ധ്യതപ്പെട്ട അധികൃതരുടെ നിശബ്ദത പ്രതിഷേധാർഹമാണെന്നും പൗരാവകാശ വേദി ആരോപിക്കുന്നു.
പ്രതിപക്ഷ നേതാവെന്ന നിലയിൽ മുഖ്യമന്ത്രിയുടെയും സർക്കാരിന്റെയും ശ്രദ്ധയിലേക്ക് വിഷയം കൊണ്ടുവരാൻ ഇടപെടൽ നടത്തണമെന്നും പൗരാവകാശ വേദി പ്രസിഡന്റ്‌ നൗഷാദ് തെക്കുംപുറം, ഭാരവാഹികളായ വി.പി. സുഭാഷ്, കെ.പി. അഷറഫ് എന്നിവർ ചേർന്ന് സമർപ്പിച്ച നിവേദനത്തിൽ ആവശ്യപ്പെട്ടു.