തൃശൂർ: പതിനൊന്നാമത് അന്താരാഷ്ട്ര നാടകോത്സവത്തിന്റെ വരവറിയിച്ചു നടന്ന ഘോഷയാത്രയിൽ പ്രളയാനന്തര കേരളത്തിന്റെ ഉയിർത്തെഴുന്നേൽപ്പ് അവതരിപ്പിച്ച് സ്‌കൂൾ ഒഫ് ഡ്രാമയിലെ വിദ്യാർത്ഥി കൂട്ടം സാംസ്‌കാരിക നഗരിയെ നാടകത്തിന്റെ ആഘോഷത്തിലേക്ക് ആനയിച്ചു. നാടകത്തിലെ കഥാപാത്രങ്ങൾ സാഹിത്യ അക്കാഡമി മുതൽ സംഗീത നാടക അക്കാഡമി വരെ ഘോഷയാത്രയായി നടന്നെത്തിയ ശേഷമായിരുന്നു അവതരണം. സാഹിത്യ അക്കാഡമി അദ്ധ്യക്ഷൻ വൈശാഖൻ ഫ്‌ളാഗ് ഒഫ് ചെയ്തു. നാടക അക്കാഡമി സെക്രട്ടറി എൻ. രാധാകൃഷ്ണൻ നായർ ഫെസ്റ്റിവൽ പതാക ഉയർത്തി. 20ന് മന്ത്രി എ.കെ. ബാലൻ നാടകോത്സവം ഉദ്ഘാടനം ചെയ്യും. ആദ്യ നാടകമായി ശ്രീലങ്കയിൽ നിന്നുള്ള ജനകാരാലിയ നാടകസംഘം അവതരിപ്പിക്കുന്ന 'ബിറ്റർ നെക്ടർ' അരങ്ങേറും. വരുന്ന ശനിയാഴ്ച ശ്രീലങ്കൻ നാടക സംഘം എത്തിച്ചേരും.