തിരുവനന്തപുരം: ശബരിമല വിഷയത്തിൽ ഏഴ് ദിവസമായി സെക്രട്ടേറിയറ്റിനു മുന്നിൽ നിരാഹാരം നടത്തിവന്ന ബി.ജെ.പി സംസ്ഥാന വൈസ് പ്രസിഡന്റ് എൻ. ശിവരാജനെ ആരോഗ്യനില വഷളായതിനെ തുടർന്ന് അറസ്റ്റു ചെയ്തു ജനറൽ ആശുപത്രിയിലേക്ക് മാറ്റി. പകരം സംസ്ഥാന ഉപാദ്ധ്യക്ഷൻ പി.എം. വേലായുധൻ നിരാഹാരം ആരംഭിച്ചു.

സമരം തുടങ്ങിയിട്ട് 33 ദിവസമായി. ശബരിമലയിലെ നിരോധനാജ്ഞ പിൻവലിക്കുക, ​ആചാരങ്ങൾ സംരക്ഷിക്കുക, നിയന്ത്രണങ്ങൾ നീക്കുക, ഭക്തർക്കെതിരായ കേസുകൾ പിൻവലിക്കുക തുടങ്ങിയ ആവശ്യങ്ങളുന്നയിച്ചു കഴിഞ്ഞ മൂന്നിനാണ് ബി.ജെ.പി നിരാഹാരസമരം ആരംഭിച്ചത്. സംസ്ഥാന ജനറൽ സെക്രട്ടറി എ.എൻ. രാധാകൃഷ്ണൻ, മുൻ അദ്ധ്യക്ഷൻ സി.കെ. പത്മനാഭൻ, ശോഭാ സുരേന്ദ്രൻ എന്നിവരാണ് ആദ്യഘട്ടത്തിൽ നിരാഹാരമനുഷ്ഠിച്ചത്.