തിരുവനന്തപുരം: തലസ്ഥാന നഗരിക്ക് വർണ വൈവിദ്ധ്യങ്ങളുടെ പൂക്കാലമൊരുക്കി ' വസന്തോത്സവം' 11 മുതൽ 20 വരെ കനകക്കുന്നിലും സൂര്യകാന്തിയിലും നടക്കും. പൂർണമായും സ്‌പോൺസർഷിപ്പ്, സ്റ്റാളുകൾ, ടിക്കറ്റ് എന്നിവയുടെ വില്പന വഴിയാണ് ഈ വർഷത്തെ വസന്തോത്സവം സംഘടിപ്പിക്കുന്നത്. മേളയുടെ നടത്തിപ്പ് പൂർണമായും ഗ്രീൻപ്രോട്ടോക്കോൾ പാലിച്ചായിരിക്കും. ടിക്കറ്റ് വില്പനയിലൂടെ ലഭിക്കുന്ന തുകയുടെ 10 ശതമാനം മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നൽകുമെന്ന് മന്ത്രി കടകംപള്ളി സരേന്ദ്രൻ അറിയിച്ചു. വസന്തോസവത്തിന്റെ ഉദ്ഘാടനം 11ന് വൈകിട്ട് 5ന് കനകക്കുന്നിൽ മുഖ്യമന്ത്രി പിണറായി വിജയൻ നിർവഹിക്കും. മന്ത്രി കടകംപള്ളി സരേന്ദ്രൻ അദ്ധ്യക്ഷനാകും.
സെക്രട്ടേറിയറ്റ്, മ്യൂസിയം മൃഗശാല, കാർഷിക കോളേജ്, ജവഹർലാൽ നെഹ്‌റു ബോട്ടാണിക്കൽ ഗാർഡൻ, വിക്രം സാരാഭായി സ്‌പേ്‌സ് സെന്റർ, മലബാർ ബൊട്ടാണിക്കൽ ഗാർഡൻ, കേരള വനഗവേഷണ കേന്ദ്രം, കിർത്താഡ്‌സ്, നിയമസഭാമന്ദിരം, കേരള യൂണിവേഴ്‌സിറ്റി ബോട്ടണി വിഭാഗം, പൂജപ്പുര ആയുർവേദ ഗവേഷണ കേന്ദം തുടങ്ങി 12ഓളം സ്ഥാപനങ്ങളും പത്തോളം നഴ്‌സറികളും നിരവധി വ്യക്തികളും പങ്കെടുക്കും. വടക്ക് കിഴക്കൻ സംസ്ഥാനങ്ങളിൽ നിന്നുള്ള സിംപീഡിയം ചെടികളുടെ പ്രദർശനം, പൂനെയിൽ നിന്നുള്ള കാർണേഷൻ ചെടികൾ, അഡീനിയം ചെടികളുടെ ശേഖരം, ജവഹർലാൽ നെഹ്‌റു ബൊട്ടാണിക്കൽ ഗാർഡൻ ഒരുക്കുന്ന വനക്കാഴ്ചകൾ, മലബാർ ബൊട്ടാണിക്കൽ ഗാർഡൻ തയ്യാറാക്കുന്ന ജലസസ്യങ്ങൾ, ടെറേറിയം എന്നിവയുടെ അപൂർവകാഴ്ചകൾ, കിർത്താഡ്‌സ് ഒരുക്കുന്ന വംശീയ പാരമ്പര്യ വൈദ്യ സ്റ്റാളുകൾ, ഗോത്രവർഗക്കാരുടെ തനത് ഭക്ഷ്യ വിഭവങ്ങൾ, ഔഷധസസ്യ ശേഖരം, ജൈവവൈവിദ്ധ്യ സംരക്ഷണം, വനസംരക്ഷണം, വന്യജീവി സംരക്ഷണം എന്നിവയ്ക്ക് പ്രാധാന്യം നൽകുന്ന വനം വകുപ്പിന്റെ 'കാടിന്റെ പുനസൃഷ്ടി', വന ഉത്പന്നങ്ങളുടെ വില്പന നടത്തുന്ന 'വനശ്രീ' സ്റ്റാൾ, 'തേൻകൂടുമായി ഹോർട്ടികോർപ്പ്, കാർഷികോത്പന്നങ്ങളടെയും മൂല്യ വർദ്ധിത ഉത്പന്നങ്ങളുടെയും പ്രദർശനം ഒരുക്കുന്ന സംസ്ഥാന കൃഷി വകുപ്പ് സ്റ്റാളുകൾ എന്നിവ ഇത്തവണത്തെ സവിശേഷതകളാണ്. സൂര്യകാന്തിയിൽ ഭക്ഷ്യമേളയും കൂടാതെ വിവിധ നഴ്‌സറികളിൽ നിന്നുള്ള ഉത്പന്നങ്ങളുടെ വിപണനവും ഉണ്ടായിരിക്കും.

ടിക്കറ്റുണ്ട് !

മേളയിലേക്കുള്ള പ്രവേശനം ടിക്കറ്റ് മുഖേന നിയന്ത്രിക്കും. അഞ്ചുവയസിന് താഴെ സൗജന്യമാണ്. 12 വയസ് വരെ ഒരാൾക്ക് 20 രൂപയും, 12 വയസിന് മുകളിലുള്ളവർക്ക് 50 രൂപയുമാണ് നിരക്ക്. പരമാവധി 50 പേർ അടങ്ങുന്ന സ്‌കൂൾ കുട്ടികളുടെ സംഘം 500 രൂപ നൽകിയാൽ മതി. ടിക്കറ്റുകൾ കേരള സ്റ്റേറ്റ് കോ ഓപ്പറേറ്റീവ് ബാങ്കിന്റെ നഗരത്തിലെ ഒമ്പതു ശാഖകൾ വഴി ജനുവരി ഒമ്പത് മുതൽ ലഭിക്കും. കനകക്കുന്ന് പ്രധാന കവാടത്തിന് അടുത്തായി 10 ഓളം ടിക്കറ്റ് കൗണ്ടറുകൾ കേരള സ്റ്റേറ്റ് കോ ഓപ്പറേറ്റീവ് ബാങ്കിന്റെ നേതൃത്വത്തിൽ 11 മതൽ 20 വരെ പ്രവർത്തിക്കും. രാവിലെ 10 മുതൽ രാത്രി 8 വരെയാണ് മേളയിലേക്കുള്ള പ്രവേശനം.