തിരുവനന്തപുരം : പ്രധാനമന്ത്രി നരേന്ദ്രമോദി ഒരു ദിവസത്തെ സന്ദർശനത്തിന് ഇന്ന് കേരളത്തിലെത്തും. കൊല്ലത്തും തിരുവനന്തപുരത്തും അദ്ദേഹം പരിപാടികളിൽ പങ്കെടുക്കും.

വൈകിട്ട് നാലിന് തിരുവനന്തപുരം എയർഫോഴ്സ് ടെക്നിക്കൽ ഏരിയയിൽ വിമാനമിറങ്ങുന്ന അദ്ദേഹം, അവിടെനിന്ന് ഹെലികോപ്ടറിൽ കൊല്ലത്തേക്ക് തിരിക്കും. 4.50ന് ആശ്രാമം മൈതാനത്ത് കൊല്ലം ബൈപാസിന്റെ ഉദ്ഘാടനം നിർവഹിക്കും.
5.30ന് കൊല്ലം കന്റോൺമെന്റ് ഗ്രൗണ്ടിൽ നടക്കുന്ന എൻ.ഡിഎ റാലിയെ അദ്ദേഹം അഭിസംബോധന ചെയ്യും.

പ്രധാനമന്ത്രി എത്തുന്നതിന് ഒന്നര മണിക്കൂർ മുൻപ് സമ്മേളനം ആരംഭിക്കും. ബി.ജെ.പി സംസ്ഥാന പ്രസിഡന്റ് പി.എസ്. ശ്രീധരൻപിള്ള അദ്ധ്യക്ഷത വഹിക്കും. എൻ.ഡി.എ ചെയർമാനും ബി.ഡി.ജെ.എസ് സംസ്ഥാന പ്രസിഡന്റുമായ തുഷാർ വെള്ളാപ്പള്ളി സ്വാഗതം പറയും. എം.പിമാരായ വി. മുരളീധരൻ, നളിൻകുമാർ കട്ടീൽ, സുരേഷ് ഗോപി, റിച്ചാർഡ് ഹേ എന്നിവരും സമ്മേളനത്തിൽ പങ്കെടുക്കും.

ആശ്രാമം മൈതാനത്തെ ഹെലിപാഡിൽ നിന്ന് തിരുവനന്തപുരത്തേക്ക് തിരിക്കുന്ന പ്രധാനമന്ത്രി ഏഴിന് തിരുവനന്തപുരത്ത് തിരികെ എത്തും.
തിരുവനന്തപുരത്ത് ശ്രീപദ്മനാഭ സ്വാമി ക്ഷേത്രത്തിൽ സ്വദേശ് ദർശൻ പദ്ധതിയുടെ ഉദ്ഘാടനം രാത്രി 7.20 ന് നിർവഹിച്ചശേഷം അദ്ദേഹം ക്ഷേത്രദർശനം നടത്തും. രാത്രി എട്ടുമണിക്ക് ഡൽഹിക്ക് മടങ്ങും.