 പ്രദർശനം തിരുവനന്തപുരം കൈരളി തിയേറ്ററിൽ രാവിലെ 9.00 ന്  മുഖ്യമന്ത്രി മുഖ്യാതിഥിയാകും

തിരുവനന്തപുരം: കേരള നവോത്ഥാന ചരിത്രത്തിലെ ആത്മീയസൂര്യനായ ശ്രീനാരായണ ഗുരുദേവന്റെ ജീവിത മുഹൂർത്തങ്ങളും ചരിത്രഗതി മാറ്റിയ കർമ്മപഥങ്ങളും ഉൾപ്പെടുത്തി കൗമുദി ടിവി നിർമ്മിക്കുന്ന 'മഹാഗുരു' മെഗാ പരമ്പരയുടെ പ്രിമിയർ ട്രെയിലർ പ്രദർശനം ഇന്നു രാവിലെ 9ന് തിരുവന്തപുരം കൈരളി തിയേറ്ററിൽ നടക്കും. മുഖ്യമന്ത്രി പിണറായി വിജയൻ മുഖ്യാതിഥിയാകും.

'മഹാഗുരു' പരമ്പരയുടെ പ്രചാരണാർത്ഥം കേരളമൊട്ടാകെ നടത്തുന്ന റോഡ് ഷോ മുഖ്യമന്ത്രി ഫ്ളാഗ് ഓഫ് ചെയ്യും. 30 മിനിട്ട് ദൈർഘ്യമുള്ള ട്രെയിലർ ആണ് പ്രദർശിപ്പിക്കുക. സാമൂഹ്യ,​ രാഷ്ട്രീയ,​ സാഹിത്യ, സാംസ്കാരിക മേഖലകളിലെ വിശിഷ്ട വ്യക്തികളും കേരളകൗമുദി ചീഫ് എഡിറ്റർ ദീപുരവിയും സംബന്ധിക്കും. പാറശ്ശാലയിൽ നിന്ന് റോഡ് ഷോ അരുവിപ്പുറം,​ ചെമ്പഴന്തി ഗുരുകുലം, ​ശിവഗിരി, ​ആലുവ അദ്വൈതാശ്രമം തുടങ്ങി ഗുരുദേവനുമായി ബന്ധപ്പെട്ട പുണ്യകേന്ദ്രങ്ങളിലൂടെ കടന്ന് കാസർകോട്ട് സമാപിക്കും. പ്രധാന കേന്ദ്രങ്ങളിൽ 'മഹാഗുരു' ട്രെയിലർ പ്രദർശിപ്പിക്കും.

ശ്രീനാരായണ ഗുരുദേവനെപ്പറ്റിയുള്ള ആധികാരിക ഗ്രന്ഥങ്ങളുടെ പിൻബലത്തോടെ, ഗുരുവിന്റെ ജനനം, ബാല്യം, കൗമാരം, വാരണപ്പള്ളിയിലെ വിദ്യാഭ്യാസം, വിവാഹം, മരുത്വാമലയിലെ തപസ്സ്, അരുവിപ്പുറം പ്രതിഷ്ഠ, ശിവഗിരി ശാരദാപ്രതിഷ്ഠ, മറ്റു ക്ഷേത്ര പ്രതിഷ്ഠകൾ എന്നിവ പരമ്പരയിൽ ഉൾപ്പെടുത്തിയിട്ടുണ്ട്. മഹാത്മാഗാന്ധി, രവീന്ദ്രനാഥ ടാഗോർ, സ്വാമി വിവേകാനന്ദൻ, തൈക്കാട് അയ്യാഗുരു, ചട്ടമ്പിസ്വാമികൾ, മഹാത്മാ അയ്യങ്കാളി, ഡോ. പല്പു, മഹാകവി കുമാരനാശാൻ, വെളുത്തേരി, പെരുന്നല്ലി, മൂലൂർ, സഹോദരൻ അയ്യപ്പൻ, ടി.കെ. മാധവൻ, സി.വി. കുഞ്ഞുരാമൻ, ശിവലിംഗദാസ സ്വാമി, ഭൈരവൻ ശാന്തി തുടങ്ങി നൂറുകണക്കിന് ചരിത്രപുരുഷന്മാർ കഥാപാത്രങ്ങളായി എത്തുന്ന പരമ്പരയിൽ ഗുരുവുമായി ബന്ധപ്പെട്ട അദ്ഭുത കഥകൾ, നർമ്മ കഥകൾ, കാരുണ്യ കഥകൾ എന്നിവയുമുണ്ടാകും. നൂറ് എപ്പിസോഡുകളായാണ് പരമ്പര പൂർത്തിയാവുക.

കേരളകൗമുദി ജോയിന്റ് മാനേജിംഗ് ഡയറക്ടർ ദർശൻ രവിയാണ് നിർമ്മാണച്ചുമതല വഹിക്കുന്നത്. കവിയും കേരളകൗമുദി സ്പെഷ്യൽ പ്രോജക്ട്സ് എഡിറ്ററുമായ മഞ്ചു വെള്ളായണി രചനയും കൗമുദി ടിവി പ്രോഗ്രാംസ് ചീഫ് ഡോ. മഹേഷ് കിടങ്ങിൽ സംവിധാനവും നിർവഹിക്കുന്നു.