തിരുവനന്തപുരം: സംസ്ഥാനത്തെ 53 പൊലീസ് സ്റ്റേഷനുകളിൽ 'ഓപ്പറേഷൻ തണ്ടർ' എന്ന പേരിൽ വിജിലൻസ് നടത്തിയ മിന്നൽ പരിശോധനകളിൽ വൻക്രമക്കേടുകൾ കണ്ടെത്തി. കണക്കിൽപെടാത്ത സ്വർണവും പണവും പിടിച്ചെടുത്തു. നിരവധി വാഹനങ്ങൾ അന്യായമായി പിടിച്ചിട്ടിരിക്കുന്നത് കണ്ടെത്തി.

കൊല്ലം കരുനാഗപ്പള്ളി സ്​റ്റേഷനിൽ 80000ത്തോളം രൂപയും കോഴിക്കോട് പയ്യോളി സ്​റ്റേഷനിൽ 57740 രൂപയും കോഴിക്കോട് ടൗൺ സ്​റ്റേഷനിൽ 3060 രൂപയും കാണാനില്ല. ക്യാഷ് ബുക്കിൽ രേഖപ്പെടുത്തിയ തുകയിലാണ് കുറവ്.

പൊലീസുകാർക്ക് ക്വാറി മാഫിയകളുമായി ബന്ധമുണ്ടെന്നും പണമിടപാടു കേസുകളിലും വാഹനാപകട കേസുകളിലും ശരിയായ അന്വേഷണം നടത്തുന്നില്ലെന്നും ഇന്റലിജൻസ് റിപ്പോർട്ട് നൽകിയ പശ്ചാത്തലത്തിലായിരുന്നു പരിശോധന.

രജിസ്​റ്ററിൽ പതിക്കാത്ത നൂറുകണക്കിന് പരാതികളാണ് കണ്ടത്. പലതിലും പരാതിക്കാർക്ക് എഫ്.ഐ.ആറിന്റെ പകർപ്പുകളും രസീതുകളും നൽകിയിട്ടില്ല. ചിലിടത്ത് മണൽ,ക്വാറി മാഫിയുമായി ബന്ധപ്പെട്ട ഒരു കേസുപോലും 2012ന് ശേഷം രജിസ്​റ്റർ ചെയ്തിട്ടില്ല.

കാസർകോട് ബേക്കൽ സ്​റ്റേഷനിൽ കണക്കിൽ പ്പെടാത്ത 12.7ഗ്രാം സ്വർണവും 5 മൊബൈൽ ഫോണുകളും ഉണ്ടായിരുന്നു.അനധികൃതമായി പിടിച്ചിട്ട നൂറോളം വാഹനങ്ങളും 2 വാഹനങ്ങളുടെ ഒറിജിനൽ രേഖകളും കണ്ടെത്തി. കോഴിക്കോട് ടൗൺ സ്​റ്റേഷനിൽ 11.52 ഗ്രാം സ്വർണവും 4223 രൂപയും 2 മൊബൈൽ ഫോണുകളും 11 പെ​റ്റീഷനുകളും അനാഥമായി കണ്ടെത്തി.

വയനാട് മേപ്പാടിയിൽ ഒരു വർഷത്തോളമായി യാതൊരു നടപടിയും സ്വീകരിക്കാത്ത മൂന്നു പണമിടപാട് കേസുകളുണ്ട്. നിരവധി ആധാർ കാർഡുകളും ഡ്രൈവിംഗ് ലൈസൻസുകളും ഉപേക്ഷിക്കപ്പെട്ട നിലയിലായിരുന്നു.പുൽപ്പള്ളി സ്​റ്റേഷനിൽ ജനുവരി ഒന്നിനുശേഷം ക്യാഷ് ബുക്ക് എഴുതിയിട്ടില്ല.

മാവേലിക്കരയിൽ 2018ൽ മദ്യപിച്ച് വാഹനമോടിച്ച 1092 കേസുകളും മ​റ്റും റിപ്പോർട്ട് ചെയ്തിട്ടുണ്ടെങ്കിലും 318 കേസുകളിൽ മാത്രമേ ഡ്രൈവിംഗ് ലൈസൻസ് അസാധുവാക്കാൻ റിപ്പോർട്ട് നൽകിയിട്ടുള്ളൂ. മാവേലിക്കര, ആലപ്പുഴ നോർത്ത് സ്‌​റ്റേഷനുകളിൽ വാഹനാപകട കേസുകളിൽ രേഖകൾ അനധികൃതമായി പിടിച്ചു വച്ചതായും കണ്ടെത്തി.

മ​റ്റു സ്​റ്റേഷനുകളിലും പരിശോധന നടത്തുമെന്നും വിശദമായ റിപ്പോർട്ട് സർക്കാരിന് കൈമാറുമെന്നും വിജിലൻസ് ഡയറക്ടർ ബി.എസ്.മുഹമ്മദ് യാസിൻ അറിയിച്ചു. കേസ് ഡയറികളടക്കം പിടിച്ചെടുത്താണ് വിജിലൻസിന്റെ പരിശോധന.

ഇന്റലിജൻസ് പറയുന്നത്

മണൽ കടത്തിന് പിടിക്കുന്ന ലോറികൾ പൊലീസ് പണം വാങ്ങി വിട്ടുകൊടുക്കുന്നു.

പണം ഇടപാട് കേസുകളിൽ കൈക്കൂലി വാങ്ങി കേസ് അട്ടിമറിക്കുന്നു.

വാഹനാപകടകേസുകൾ അഭിഭാഷകരെ അറിയിച്ച് കമ്മിഷൻ പറ്റുന്നു.

കേസിൽ പെടാത്ത വണ്ടികൾപോലും പിടിച്ച് കൈക്കൂലി വാങ്ങുന്നു.

ഈ ഇടപാടിൽ പ്രാദേശിക രാഷ്ട്രീയക്കാരും പൊലീസും ഇടനിലക്കാരെപ്പോലെ പ്രവർത്തിക്കുന്നു.