തിരുവനന്തപുരം: കൂടുതൽ സീറ്റുകളാവശ്യപ്പെട്ട് ഘടകകക്ഷികൾ രംഗത്തെത്തുകയും മാണിഗ്രൂപ്പിൽ ഉൾപ്പാർട്ടി പോര് ഉടലെടുക്കുകയും ചെയ്ത പശ്ചാത്തലത്തിൽ നാളെ ചേരുന്ന അടിയന്തര യു.ഡി.എഫ് യോഗത്തിലേക്ക് രാഷ്ട്രീയശ്രദ്ധ തിരിയുന്നു. ഉഭയകക്ഷി ചർച്ചകളിലേക്ക് കടന്നിട്ടില്ലെങ്കിലും നാളത്തെ യോഗത്തിൽ സീറ്റ് ചർച്ച പ്രധാന അജൻഡയാകുമെന്നാണ് സൂചനകൾ. ജേക്കബ് ഗ്രൂപ്പ് ഉൾപ്പെടെയുള്ള ചെറുകക്ഷികളുമായുള്ള ഉഭയകക്ഷി ചർച്ചകൾ നാളത്തെ യോഗത്തിന് തൊട്ടുമുമ്പായോ അടുത്ത ദിവസമോ നടത്തിയേക്കും. ഞായറാഴ്ച കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രൻ നയിക്കുന്ന ജനമഹായാത്ര കാസർകോട്ട് നിന്ന് ആരംഭിക്കുകയാണ്. യാത്രയുടെ ഇടവേളകളിൽ മുസ്ലിംലീഗ് അടക്കമുള്ള കക്ഷികളുമായുള്ള ഉഭയകക്ഷി ചർച്ചകൾ നടന്നേക്കും.

നാളെ വൈകിട്ട് 6 മണിക്ക് പ്രതിപക്ഷനേതാവിന്റെ ഔദ്യോഗിക വസതിയായ കന്റോൺമെന്റ് ഹൗസിലാണ് യോഗം ചേരുകയെന്ന് യു.ഡി.എഫ് കൺവീനർ ബെന്നി ബഹനാൻ അറിയിച്ചു.