ആലപ്പുഴ: ശബരിമല വിഷയത്തിൽ ഇടഞ്ഞുനിൽക്കുന്ന എൻ.എസ്.എസിനോട് സ്വരം കടുപ്പിച്ച് സി.പി.എം.

എൻ.എസ്.എസ് ജനറൽ സെക്രട്ടറിയുടെ മാടമ്പിത്തരം കൈയിൽ വച്ചാൽ മതിയെന്നും,​ അതിനു പിറകേ പോകാൻ സി.പി.എമ്മിനെ കിട്ടില്ലെന്നും, പാർട്ടി സംസ്ഥാന സെക്രട്ടറി കോടിയേരി ബാലകൃഷ്ണൻ പറഞ്ഞു. കേരള സംരക്ഷണ യാത്രയുടെ ഭാഗമായി ആലപ്പുഴ ഗസ്റ്റ് ഹൗസിൽ വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം.

ഞങ്ങൾ പറയുന്നത് നിങ്ങൾ കേട്ടുകൊള്ളണമെന്നത് മാടമ്പികളുടെ രീതിയാണ്. ആ ശബ്ദത്തെ അംഗീകരിക്കില്ല. ഇക്കാര്യം എൻ.എസ്.എസിലെ അണികൾക്ക് ബോദ്ധ്യപ്പെട്ടു കഴിഞ്ഞു. ആ സംഘടനയുടെ ജനറൽ സെക്രട്ടറി പറഞ്ഞാൽ,​ വേറെയാർക്കും പറയാനാവില്ല എന്ന രീതിയാണ്. എൻ.എസ്.എസിൽ എല്ലാ പാർട്ടിയിലുമുള്ളവർ ഉണ്ടെന്നത് അതിൻെറ ജനറൽ സെക്രട്ടറി മറക്കേണ്ട.

ജാതിയും മതവും പറഞ്ഞ് എൽ.ഡി.എഫിനെ തോൽപ്പിക്കാനാവില്ല. അങ്ങനെ ശ്രമിച്ചപ്പോഴൊന്നും തോറ്റിട്ടുമില്ല. എൻ.ഡി.പിയുണ്ടാക്കി എൻ.എസ്.എസ് രാഷ്ട്രീയ നിലപാട് സ്വീകരിച്ച 1987 ൽ എൽ.ഡി.എഫ് അധികാരത്തിൽ വന്നു. ഇത്തരം രാഷ്ട്രീയ നിലപാടുകൾ എൻ.എസ്.എസ് മുമ്പും നടത്തിയിട്ടുണ്ട്. അതിനെ നേരിടാൻ എൽ.ഡി.എഫിന് കഴിഞ്ഞിട്ടുണ്ടെന്നും കോടിയേരി പറഞ്ഞു.