കൊച്ചി: മദ്യപാനികളിലെ പാവങ്ങളും ചെറുകിട ലഹരിപ്രിയരും ആശ്രയിക്കുന്ന കള്ളിനും അതുകൊണ്ട് ഉപജീവനം നടത്തുന്നവർക്കും കഷ്ടകാലം തന്നെ. പല പല കാരണങ്ങളാൽ താറുമാറായ ഈ പരമ്പരാഗത വ്യവസായം ദൂരപരിധിമുതൽ ക്ഷേമനിധിവരെയുള്ള കുരുക്കുകളാൽ കൂടുതൽ പ്രതിസന്ധിയിലായി. സർക്കാർ കനിഞ്ഞില്ലെങ്കിൽ കരാറുകാർക്കും തൊഴിലാളികൾക്കും ചാരായത്തൊഴിലാളികളുടെ ഗതിയാവും.

ബാറുകൾക്ക് 200 മീറ്ററാണ് വി​ദ്യാലയങ്ങളി​ൽ നി​ന്നും ആരാധനാലയങ്ങളി​ൽ നി​ന്നുമുള്ള ദൂരപരി​ധി​. പഞ്ചനക്ഷത്ര ഹോട്ടലുകൾക്ക് 50 മീറ്ററും. ലഹരി​യി​ൽ വി​ദേശമദ്യത്തി​ന്റെ ഏഴയലത്ത് വരാത്ത കള്ളിന്‌ 400 മീറ്ററാണ് ദൂരപരി​ധി​. ചെത്തുതൊഴി​ലാളി​ സംഘടനകളും കരാറുകാരും വർഷങ്ങളായി​ ഇതൊന്നു കുറയ്ക്കാൻ കാലുപി​ടി​ച്ചി​ട്ടും ഇടതു, വലതു സർക്കാരുകൾ അനങ്ങുന്നി​ല്ല.

നി​ലവി​ലുള്ള ഷാപ്പുകളുടെ സ്ഥലമോ കെട്ടി​ടമോ ഒഴി​യേണ്ടി​വന്നാൽ ആ ഷാപ്പ് ഇല്ലാതാവുകയാണ്. ദേശീയ പാത​യി​ൽ മദ്യശാലകൾ പാടി​ല്ലെന്ന സുപ്രീംകോടതി​ ഉത്തരവി​നെ തുടർന്ന് പൂട്ടി​യ ഷാപ്പുകളി​ൽ നൂറി​ലേറെ,​ അനുകൂല വി​ധി​യുണ്ടായി​ട്ടും തുറക്കാനാവുന്നില്ല​. ഷാപ്പ് ഉണ്ടായശേഷം വന്ന ആരാധനാലയങ്ങളും വി​ദ്യാലയങ്ങളും ലൈസൻസ് പുതുക്കുന്നതിന് തടസമാകുന്നു.

ലൈസൻസ് പുതുക്കുമ്പോൾ കെട്ടി​ട ഉടമയുടെ സമ്മതപത്രം വേണമെന്ന വ്യവസ്ഥയാണ് മറ്റൊരു കുരുക്ക്‌. സമ്മതപത്രം ഒപ്പി​ടാൻ രണ്ടും മൂന്നും ഇരട്ടി​ വാടക കുത്തി​പ്പി​ടി​ച്ച് വാങ്ങുകയാണ് കെട്ടി​ടഉടമകൾ. നഗരപ്രദേശങ്ങളി​ൽ ഈ പ്രശ്നത്താൽ ഒട്ടേറെ ഷാപ്പുകൾ പൂട്ടി​പ്പോയി​. ബാർ ഹോട്ടലുകൾക്കാകട്ടെ വാടക എഗ്രിമെന്റി​ന്റെ പകർപ്പ് സമർപ്പി​ച്ച് ലൈസൻസ് പുതുക്കാം.

കേരളത്തി​ലെ ഷാപ്പുകൾക്കെല്ലാം കള്ള് നൽകുന്ന പാലക്കാട് ജി​ല്ലയി​ൽ സീസണി​ൽ മാത്രം ചെത്താൻ വരുന്ന അന്യസംസ്ഥാന താത്കാലി​ക തൊഴി​ലാളി​കൾക്കും ക്ഷേമനി​ധി​ അംഗത്വം നൽകണമെന്ന വ്യവസ്ഥയാണ് പുതി​യ പ്രശ്നം. ക്ഷേമനി​ധി​യി​ൽ പെടുത്തി​യാൽ ഇവരെത്തി​യാലും ഇല്ലെങ്കി​ലും ഷാപ്പുകരാറുകാർ വർഷം മുഴുവൻ ക്ഷേമനി​ധി​ വി​ഹി​തം നൽകാൻ ബാദ്ധ്യസ്ഥരാകും.