കൊച്ചി: മലയാളത്തിന്റെ ഹാസ്യ സാമ്രാട്ട് ജഗതി ശ്രീകുമാർ വലിയൊരു ഇടവേളയ്ക്ക് ശേഷം വീണ്ടും അഭിനയ രംഗത്തേയ്ക്ക് തിരിച്ചു വരുന്നു. അപകടത്തിൽ ഗുതരമായി പരിക്കേറ്റ് ചികിത്സയിലായിരുന്ന ജഗതി, തന്റെ മകനായ രാജ് കുമാർ ആരംഭിക്കുന്ന പരസ്യ കമ്പനിയായ ജഗതി ശ്രീകുമാർ എന്റർടെയിമെന്റ്സ് ആദ്യമായി ചിത്രീകരിക്കുന്ന പരസ്യത്തിലൂടെയാണ് തിരിച്ചു വരുന്നത്.അതിരപ്പള്ളി സിൽവർസ്റ്റോം വാട്ടർ തീം പാർക്കിന്റെ പരസ്യത്തിലാണ് അദ്ദേഹം അഭിനയിക്കുന്നത്. മകൻ രാജ്കുമാർ, മകൾ പാർവതി ഷോൺ എന്നിവരും ജഗതിയുടെ പേരക്കുട്ടികളുമുൾപ്പെടെ കുടുംബാംഗങ്ങളും ഇതിൽ അഭിനയിക്കുന്നുണ്ട്. നിരവധി പരസ്യ ചിത്രങ്ങൾ ചെയ്ത സിധിനാണ് ക്രിയേറ്റീവ് ഡയറക്ടർ. സിനിമയിലെ സുഹൃത്തുക്കളെ കാണാനും ഇടപഴകാനും സാധിച്ചാൽ ജഗതിയുടെ തിരിച്ചുവരവിന് വേഗതകൂടുമെന്ന് ഡോക്ടർമാർ പറഞ്ഞതായി മകൻ രാജ്കുമാർ വാർത്താസമ്മേളനത്തിൽ പറഞ്ഞു. പരസ്യ ചിത്രത്തിന്റെ സ്വിച്ച് ഓൺ കർമ്മവും ജഗതി ശ്രീകുമാർ എന്റർടെയ്ൻമെന്റ് പരസ്യ കമ്പനിയുടെ ഉദ്ഘാടനവും 27ന് സിൽവർസ്റ്റോം വാട്ടർ തീം പാർക്കിൽ നടക്കും. ചലച്ചിത്ര താരങ്ങളും ജഗതിയുടെ സുഹൃത്തുക്കളും പങ്കെടുക്കും. വരും വർഷം സിനിമയിൽ അഭിനയിക്കാൻ ജഗതി തയ്യാറെടുക്കുകയാണെന്നും കൂടുതൽ വിവരങ്ങൾ പിന്നീട് അറിയിക്കുമെന്നും രാജ്കുമാർ കൂട്ടിച്ചേർത്തുേ. സിൽവർ സ്റ്റോം എം.ഡി. ഷാലിമാർ, സുധീർ അമ്പലപ്പാട് എന്നിവരും വാർത്താ സമ്മേളനത്തിൽ പങ്കെടുത്തു.