കണ്ണൂർ: നല്ല തലവേദന, ഒരു സ്‌ട്രോംഗ് ചായ...! ഓർഡറിടുമ്പോൾ സൂക്ഷിക്കുക...അതിൽ ഒളിച്ചിരിക്കുന്ന കാളകൂടത്തെ. അതുണ്ടാക്കുന്ന ഒടുങ്ങാത്ത തലവേദനയെ.

ചായക്ക‌ടകളിലും തട്ടുകടകളിലും ഉപയോഗിച്ച ചായപ്പൊടിയുടെ ചണ്ടി വാങ്ങി കടുപ്പവും നിറവും കിട്ടാൻ മാരക രാസവസ്‌തുക്കൾ ചേർത്ത് വീണ്ടും ചായപ്പൊടിയാക്കുന്ന നീചമായ 'മായാജാലം' നടക്കുന്നുണ്ടിവിടെ. കണ്ണൂർ ജില്ലയുടെ വിവിധ ഭാഗങ്ങളിൽനിന്ന്‌ ഭക്ഷ്യ സുരക്ഷാ വിഭാഗം ഇത്തരം വ്യാജ ചായപ്പൊടി പിടിച്ചെടുത്തിരുന്നു.

തമിഴ്നാട്ടിലെ ഗൂഡല്ലൂർ കേന്ദ്രീകരിച്ചുള്ള വൻറാക്കറ്റാണ് തേയിലച്ചണ്ടി ശേഖരിച്ച് മാരക രാസവസ്തുക്കളടങ്ങിയ നിറം ചേർത്ത് ചുരമിറക്കുന്നത്. വിലക്കുറവാണ് ഹോട്ടലുടമകളെയും തട്ടുകടക്കാരെയും ആകർഷിക്കുന്നത്. കിലോയ്‌ക്ക് 150 രൂപ മുതൽ 200 രൂപ വരെ ലാഭം. ഒരു കിലോ വ്യാജൻ ഉപയോഗിച്ച് 200 മുതൽ 300 വരെ ചായയുണ്ടാക്കാം. വെള്ളം അധികം തിളപ്പിക്കേണ്ട. മണത്തിനു ഏതെങ്കിലും ബ്രാൻഡഡ് ചായപ്പൊടി ഒരു നുള്ള് ചേർക്കുന്നവരുമുണ്ട്.

പ​ല ക​ട​ക​ളി​ൽ​ നി​ന്നും സാ​മ്പി​ൾ എ​ടു​ത്ത് കൂടുതൽ പ​രി​ശോ​ധ​നയ്​ക്ക് അ​യ​ച്ചിരിക്കുകയാണ് ഭക്ഷ്യസുരക്ഷാവിഭാഗം.

കാർമിയോസിൻ മുതൽ ടാർടാറിൻ വരെ

ചാ​യ​പ്പൊ​ടി റീ​ജിയ​ണ​ൽ അ​ന​ല​റ്റി​ക്ക​ൽ ഫു​ഡ് ല​ബോ​റ​ട്ട​റി​യി​ൽ അ​യ​ച്ചു ന​ട​ത്തി​യ പ​രി​ശോ​ധ​ന​യി​ലാ​ണ് നി​രോ​ധി​ക്ക​പ്പെ​ട്ട കൃ​ത്രി​മ വ​ർ​ണവ​സ്തു​ക്ക​ളാ​യ കാ​ർ​മി​യോ​സി​ൻ, സ​ൺസെ​റ്റ് യെ​ല്ലോ, ടാ​ർടാ​റി​ൻ എ​ന്നി​വ ചേ​ർ​ത്ത​താ​യി ക​ണ്ടെ​ത്തി​യ​ത്. ചായപ്പൊടിയുടെ ചണ്ടി ശേ​ഖ​രി​ച്ച് കേ​ര​ള​ത്തി​നു പു​റ​ത്തുള്ള ര​ഹ​സ്യ കേ​ന്ദ്ര​ത്തി​ൽ സി​ന്ത​റ്റി​ക്ക് വ​ർ​ണവ​സ്തു​ക്ക​ൾ, രു​ചിവ​ർ​ദ്ധ​ക വ​സ്തു​ക്ക​ൾ എ​ന്നി​വ ചേ​ർക്കുന്നു.

കാൻസർ തൊട്ട് ഡിപ്രഷൻ വരെ

മാ​യംക​ല​ർ​ന്ന ചാ​യ തു​ട​ർ​ച്ച​യാ​യി കു​ടി​ച്ചാ​ൽ കു​ട​ലി​ൽ കാ​ൻ​സ​ർ, അ​ല​ർ​ജി, മൈ​ഗ്രേ​യ്ൻ, തൈ​റോ​യ്ഡ് കാ​ൻ​സ​ർ, ഡി​പ്ര​ഷ​ൻ, കു​ട്ടി​ക​ളി​ൽ ഹൈ​പ്പ​ർ ആ​ക്ടി​വി​റ്റി എ​ന്നീ ഗു​രു​ത​ര ആ​രോ​ഗ്യപ്ര​ശ്ന​ങ്ങ​ൾ​ക്കി​ട​യാ​ക്കു​മെ​ന്ന് ആ​രോ​ഗ്യ വ​കു​പ്പ് അധി​കൃ​ത​ർ വ്യ​ക്ത​മാ​ക്കു​ന്നു.

'ഭക്ഷ്യവസ്തുക്കളിൽ മായം ചേർക്കുന്നത് ഒരു വർഷം തടവും അഞ്ച് ലക്ഷം വരെ പിഴയും കിട്ടാവുന്ന കുറ്റമാണ്. ബില്ലില്ലാതെ സാധനങ്ങൾ വാങ്ങുന്ന വ്യാപാരികൾക്ക് തന്നെയാണ് ഇതിന്റെ ഉത്തരവാദിത്വം. മായം കലർന്ന സാധനങ്ങൾ വിറ്റ കച്ചവടക്കാർക്ക് നോട്ടീസ് നൽകിയിട്ടുണ്ട്'

സി.എ. ജനാർദ്ദനൻ,

ഭക്ഷ്യസുരക്ഷാ വകുപ്പ് അസിസ്റ്റന്റ് കമ്മിഷണർ, കണ്ണൂർ