തലയോലപ്പറമ്പ് : പൊട്ടും നന്നാക്കും,​ വീണ്ടും പൊട്ടും...തലയോലപ്പറമ്പിലെ പൈപ്പ്പൊട്ടൽ തുടർക്കഥയാകുമ്പോഴും കാരണം കണ്ടെത്താനാകാതെ കുഴങ്ങുകയാണ് അധികൃതർ. നിലവാരമില്ലാത്ത സാമഗ്രികൾ ഉപയോഗിച്ചുള്ള അറ്റകുറ്റപ്പണിയാണ് പൊട്ടലിന് കാരണമെന്നാണ് നാട്ടുകാരുടെ ആക്ഷേപം. എന്നാൽ ഇത് സമ്മതിച്ച് തരാൻ വാട്ടർഅതോറിറ്റി തയ്യാറാകില്ല. കാലപ്പഴക്കം ചെന്ന പൈപ്പുകളാണ് വില്ലനെന്നാണ് അവരുടെ ന്യായം.

തലയോലപ്പറമ്പ് - എഴുമാന്തുരുത്ത് റോഡിൽ വൈക്കം മുഹമ്മദ് ബഷീർ സ്മാരക സ്കൂളിന് മുൻവശത്ത് ആറ് മാസത്തിനിടെ ജലവിതരണ പൈപ്പ് പൊട്ടുന്നത് ഏഴാം തവണയാണ്. പൊട്ടിയ ഭാഗം അറ്റകുറ്റപ്പണികൾ നടത്തി അധികൃതർ മടങ്ങുന്നതിന് മുമ്പേ ഈ ഭാഗം വീണ്ടും പൊട്ടും. ഇല്ലിത്തൊണ്ട് ജംഗ്ഷൻ, പ്രൈവറ്റ് ബസ് സ്റ്റാൻഡിന് സമീപം, തിരുപുരം ക്ഷേത്രം - പരദേവതാ റോഡ്, തലയോലപ്പറമ്പ് - കോലത്താർ റോഡ് തുടങ്ങി 18 ഓളം ഇടങ്ങളിലാണ് ശുദ്ധജലവിതരണ പൈപ്പ് പൊട്ടി ലിറ്ററുകണക്കിന് കുടിവെള്ളം പാഴാകുന്നത്. വീതി കുറഞ്ഞ റോഡിൽ പൈപ്പ് പൊട്ടി വെള്ളക്കെട്ട് രൂപപ്പെട്ടതോടെ കാൽനടയാത്രക്കാരുടെ ദേഹത്ത് ചെളിവെള്ളം വീഴുന്നത് പതിവാണ്.